December 17, 2016

කංඡායුධ උන්මාදය

                   මීට අවුරුදු 5 කට ඉස්සර ඒ කියන්නෙ 2011 දී එක් ලාංකීය සමාගමක් විශේෂ ව්‍යාපෘතියක් ඇරඹුවා. ඒ ඉතා උසස් ගණයේ පරිගණක ක්‍රීඩාවක් ලාංකිකයන්ට ලබා දීමට. විශේෂත්වය මේ ක්‍රීඩාව ලාංකික ඉතිහාසය හා පරිසරය යොදාගෙන නිර්මාණය වීමයි. අවුරුදු 5 කට පසු එනම් මේ වසරේ ඉකුත් 13 දා මේ ක්‍රීඩාව නිකුත් කරනු ලැබුවා.ඒ තමයි ඇරිමැක් සමාගම ඉදිරිපත් කරන කංඡායුධ. කඡායුධ කියන්නෙ සටන් ක්‍රීඩාවක් කියල නමින්ම තේරෙනවා ඇතිනේ. 
කතා තේමාව
                    මේ ක්‍රිඩාවට තේමා වී ඇත්තේ එළාර රජු අනුරාධපුරය රාජ්‍ය කරන සමයයි.  එකල රුහුණ පාලනය කරන ලද්දේ කාවන්තිස්ස රජු වන අතර ඔහුගෙන් ඊළඟට රාජ්‍ය හිමිවීමට සිටින්නේ ගැමුණු හෙවත් ගාමිණී කුමාරයායි. මෙය කාවන්තිස්ස රජුට හා ගැමුණු කුමාරයාට එකල සේවය කල දස මහා යෝධ සේනාව හා පුරාණ ජනප්‍රවාද මූලික කර තැනූවකි. ක්‍රීඩාවේ එන සටන්කාමි චරිතයට එක් විශේෂ ඉලක්කයක් ඇත. 
                    ඔහු අතීත ශ්‍රී ලංකාවේ විසු ‘භද්‍ර’ නම් ශක්තිමත් වීරයකුගේ චරිතයකි. අතීතයේ තමන් හට සිදුවූ සිදුවිමක සුළමුල සොයා යන ඔහු හට ඒ ගමනේදී විවිධාකාර ක්‍රියාවන්ට මුහුණ දීමට සිදුවේ. මෙම ක්‍රියාවන් පසු කර ගොස් තම වෘත්තාන්තයේ අවසානයට ලග වීමට ඔහු හට විවිධ ප්‍රහේලිකා විසඳීමට, ගවේෂණයට සහ ක්‍රියාදාමයන්ට මග විවර වේ. කංඡායුධ ක්‍රීඩාවේ පදනම අතීත ශ්‍රී ලංකාවේ ජිවන රටාව වුවද, මෙහි ඇති සියලුම නම් ගම් සහ සිදුවීම් මන:කල්පිතය.මෙය හුදෙක් සාමාන්‍ය ක්‍රීඩාවක් නොවන අතර උසස් තත්වයේ ග්‍රැ‍ෆික් හා තාක්ෂණික උපක්‍රම යොදා ගෙන කල ක්‍රීඩාවකි. ක්‍රීඩාව සිංහල බසින් හඬ කවා ඇති අතර වෙනත් භාෂා උපසි‍රැසි වලට සහය දක්වයි. මෙය ශ්‍රී ලාංකීය පරිගණක ක්‍රීඩා ක්ෂේත්‍රයේ විප්ලවීය නිර්මාණයකි. එය ශ්‍රී ලාංකිකයන් අතර දැන් ඉතාමත් ජනප්‍රිය ය.

නිමැවුම් කරුවන්

                   මුලින් සඳහන් කල ආකාරයට මෙම ක්‍රීඩාව නිමවනු ලැබුවේ ඇරිමැක් නම් ශ්‍රී ලාංකීය සමාගම විසින් 25ක් පමණ කණ්ඩායමක එකමුතුවෙනි. ඇරිමැක් සමාගමේ මුල්ම ක්‍රීඩාව මෙය නොවේ. මීට පෙර ඔවුන් විසින් විවිධ පන්නයේ මධ්‍යම ප්‍රමාණයේ ක්‍රීඩා හඳුන්වා දී ඇති අතර කංඡායුධ ඒ අතරින් බිහි වූ දැවැන්ත පරිගණක ක්‍රීඩාවකි. මීට අමතරව ලංකාවේ පලමු ගේම් හබ් (Game Hub) එක ද ඔවුන් සතුවේ.

කීයක් වෙයිද?
                 ඇරිමැක් සමාගම විසින් මුලින් සඳහන් කලේ මෙය රු 2850 වැනි මුදලකට ලබා දීමට වුවත් පසුව එය මාස 6ක කාලයක් නොමිලේ බාවිතා කිරීමට අවස්තාව ලබා දී තිබෙනවා. එය බොහෝ දෙනාගේ පැසසුමට ලක් වී තිබෙනවා. කංඡායුධ ක්‍රිඩාව ක්‍රීඩා කිරීමට කැමති නමුත් එය මිල්දී ගැනීමට තමන්ට හැකියාවක් නොමැති බව හා එය නොමිලේ ලබාදිය හැකිදැයි පවසා සමාජ ජාල මගින් කංඡායුධ නිර්මාණ කරුවන්ගෙන් කල ආයාචනයට අනුව ඇරිමැක් සමාගම මෙසේ නොමිලේ දීමට තීරණය කර් ඇත.
                    එහෙත් ඕනෑම කෙනෙකුට එය රු.1,500 සිට රු 10,000 දක්වා මුදලක් ලබා දී ලබා ගැනීමටද පුලුවන්. තමන්ට මෙවැනි මුදලක් ගෙවීමට හැකියාවක් ඇති නම් එය ගෙවා ක්‍රීඩාව ලබා ගන්නේ නම් එය නිර්මාපකයන්ට කරන උපහාරයක්, ගෞරවයක් මෙන්ම ශ්‍රී ලාංකීය තොරතුරු තාක්ෂණයට දෙන තල්ලුවක්ද වනු ඇත.

කොහොමද දෙන්නෙ?
                   කංඡායුධ ප්‍රථමයෙන් වින්ඩෝස් පරිගණක සඳහා ඩිජිටල් ඩවුන්ලෝඩ් වශයෙන්ද, ඉන් පසු වීඩීඩී හරහාද නිකුත් වන අතර, ඉදිරියේදී මැක් ඕඑස්, ප්ලේස්ටෙශන් 4 සහ එක්ස් බොක්ස් වන් සඳහා නිකුත් කිරීමට නියමිතය. ඊට අමතරව, ස්මාර්ට් ෆෝන් සඳහා (ඇන්ඩ්‍රොයිඩ්, අයි ඕඑස් සහ වින්ඩෝස්) ද, වර්චුවල් රියැලිටි (HTC vive, Oculus Rift and OSVR) සඳහාද මේ හා සමගාමී පරිගණක ක්‍රීඩා නිකුත් කිරීමට සැලසුම් කර ඇත.

ඩවුන්ලෝඩ් කරගැනීම
               ගේම් එක ඩවුන්ලෝඩ් කරගන්න (5.4GB විතර...) කංඡායුධ නිල වෙබ් අඩවිය www.kanchayudha.com වලින් පුලුවන්.  

ඒ විශිෂ්ඨ නිමැවුම
           අවුරුදු 5 ක් දහඩිය, බුද්ධිය, ධනය වැයකොට කල නොහැකි දේ කල හැකිය යන්න රටටම පෙන්වා, ලාංකිකයන්ට දේශිය නිෂ්පාදනයක් ලබා දී නව හැරවුම් ලක්ෂයක් සනි‍ටුවන් කරමින් එයින් නොනැවතී මේ අනර්ඝ නිමැවුම නොමිලේ ලබා දෙමින් ඔවුන් කරනා මෙහෙය සැබවින්ම අගය කල යුතුය. උපහාරය හිමිවිය යුතුය.

December 14, 2016

IDM අතහරිමු FDM වැළඳගනිමු.

                ඉන්ටනෙට් යන ගොඩක් අය ලඟ තියෙන ඩවුන්ලෝඩර් වැඩසටහන තමයි IDM නැත්නම් Internet Download Manager කියන්නෙ. මෙක ඇත්තටම හොඳ පහසුකම් වලින් පිරුණු හොඳ සොෆ්ට්වෙයා එකක්. ඒ පහසුකම් හින්දම මේක මුදලට විකුණන එකක් වෙලා. ඉතිං අපේ අය ඕක තමං‍ඟෙ කොම්පියුටරේ දාගෙන ඉන්න විදිය අහන්න ඕනි නෑනෙ. හැමෝම නොවෙන්න පූලුවන් ඒත් ගොඩක් අය ක‍රැක් කරපු එක තමයි දාගෙන ඉන්නෙ. ඒකත් ටික කාලයක් යනකොට මාට්‍ටු වෙන බව පාවිච්චි කරන අය දන්නවා.
     ඉතිං FDM නැත්නම් Free Download Manager කියන්නෙ IDM ගුණාංඟ ඒ විදිහටම තියෙන ටොරන්ට් ෆයිල් ඩවුන්ලෝඩ් කරන්න පුලුවන් වගේ අමතර පහසුකම් තියෙන සොෆ්ට් වෙයා එකක්.2007 ඉඳන් තමයි මේක දියුණු කරන්නෙ.
                           ඒ වගේම මන්දගාමී අන්තර්ජාල සම්බන්ධතා වලට හරියන ස්නේල් මොඩ් (ගොලුබෙලි ඩවුලෝඩින්? අපේ රටේ නම් ‍ෆ්‍රී වයි ෆයි මොඩ් එක කිව්වත් අවුලක් නෑ!😜) වගේ පහසුකම් තියෙනවා.මෙතනින් ගිහිං ඕනි කෙනෙකුට නොමිලේ ඩවුන්ලෝඩ් කරගන්න පුලුවන්. වින්ඩොස් වගේම මැක් වලටත් තියෙනවා.එහෙමත් නැත්නම් මෙතනින් වින්ඩෝස් වලට කෙලින්ම ඩවුන්ලෝඩ් කරගන්න පුලුවන් .සෙටප් ෆයිල් එක 50MB විතර තියෙනවා. ඉතිං.. වරක් පාවිච්චි කර වෙනස වටහා ගන්න..!

November 16, 2016

හාඩ් ඩිස්ක් එකක් ගලවමු.

හපොයි.. සෑහෙන කාලෙකට පස්සෙ. පොඩි පොඩි අලකලංචි ටිකක් උනා. ඒකයි ඩිංගිත්තක් පරක්කු උනේ😜. හරී.. පරිගණකයේ තියෙන ප්‍රධානම උපාංඟයක් තමයි දෘඩ තැටිය කියන්නෙහරියටම කිව්වොත් මේක තමයි පරිගණකයේ ප්‍රධාන දත්ත ගබඩාව. කට්ටිය ඉතිං දන්නෙ හාඩ් ඩිස්ක් එක, කොටින් කිව්වොත් හාර්ඩ් එක කිව්වොත් තමයි.
පරිගණක විද්‍යාවෙදි දෘඩ තැටිය හඳුන්වන්නෙ වෙන්නෙ ද්විතියික ආචයන මතක උපාංගයක් (Secondary memory device) විදිහට. නමින් දැඩි උනාට හාඩ් ඩිස්ක් එක ගොඩක් සංවේදී උපාංඟයක්. ලෝහයෙන් හදපු පිටත ආවරණයෙ පටන් බොහෝ කොටස් නිර්මාඅණය කරල තියෙන්නෙ හාඩ් ඩිස්ක් එකේ ප්‍රධානම කොටස වෙන දත්ත තැන්පත් කරන තැටිය ආරක්ෂා කරන්න. දත්ත තැන්පත් කරන ආකාරය අනුව මේක අයත් වෙන්නෙ චුම්බක මාධ්‍ය (Magnetic media) ගණයටයි .මේ තැටියෙ දත්ත තැන්පත් කරන්නේ චුම්බක යොදා ගනිමිනි.

පිටත ආවරණය
           පිටත ආවරණයේ හාඩ් ඩිස්ක් එක ගැන විස්තර සඳහන් වෙනවා. හාඩ් එකේ ධාරිතාව, සිලින්ඩර් නැත්නම් දත්ත තැන්පත් කරන්න පුලුවන් වට ගණන, හෙඩ් ගණන වගේ ගොඩක් විස්තර තියෙනවා. 
              ගොඩක් අය දන්න දෙයක් තමයි හාඩ් ඩිස්ක් එකේ සඳහන් කරල තියෙන ධාරිතාවම ඒකෙ නැති වෙන එක. ඒත් ඇත්තටම වෙන්නේ මෙහෙම දෙයක්. හාඩ් නිෂ්පාදනය කරන අය 1GB කියන්නෙ 1000MB වලට. ඒත් පරිගණක වලදී 1GB කියන්නෙ 1024MB වලට. ඉතිං පරිගණකයෙ පෙන්නනෙ අඩු ධාරිතාවක්. ( උදා:- 40GB එකක ඇත්තටම තියෙන්නෙ 40x1000=40,000MB. පරිගණකයට අනුව 40GB = 40x1024= 40,960MB. )
මේකෙ තියෙන ඇණ ගලවන්න සාමාන්‍ය නියන් වලින් නම් බෑ. ඒකට දුරකතන අලුත් වැඩියා කරන අය ලඟ තියෙන වර්ගයේ නියන් ඕනි. මතක තියාගන්න ඕනි වැදගත් දෙයක් තියෙනවා. 
                  💀  හාඩ් ඩිස්ක් එකක් ගැලව්වට පස්සෙ ඒක ආයෙ පාවිච්චි කරන්න බෑ. ඒ නිසා ගලවනවනම් වැඩකරන්නෙ නැති අයින් කරපු එකක් හොයා ගන්න.ඒ නිසා හොඳට වැඩකරන එව නම් ගලවන්න එපා ගොයියො!!
                   මුලින්ම මේකෙ සර්කිට් බෝඩ් එක ගලවමු. හාඩ් ඩිස්ක් එකේ සියලු කටයුතු පාලනය කරන්නෙ මේ පරිපථ පුවරුවෙ තියෙන කොටස් වලින්. ඒ වගේම පරිගණකයට සම්බන්ද කරන කේබල් සම්බන්ධ වෙන්නෙත් මේ පුවරුවට.
                        සර්කිට් බෝඩ් එක ඇතුලෙ තියෙන උපාංඟ එක්ක සම්බන්ධ කරල තියෙන්නෙ ස්පර්ෂක ක්‍රමයට. ඒ ඇතුලට වාතය ඇතුල්වීම වලක්වන්නට.
                ඩිස්ක් එක තිබෙන කොටස තිබෙන්නේ රික්තකයක් තුලයි. හාඩ් ඩිස්ක් ඒක මතුපිට බලන කොට ඇලුමිනියම් රවුම් ආකාරයට තිබෙන වැස්මවල් දකින්න පුලුවන්. ඒවා හදිසියේ වත් පලුදු වුණෝතින් ඇතුලට වාතය ඇතුල් වෙනවා.
ඇතුලත
                          දැන් උඩ පියනේ ඇණ ඉවත් කරමු. ඇණ එකින් එක අයින් කරලත් ගලවන්න බැරිවෙන්න පුලුවන්.

                ඒකට හේතුව උඩින් අලවල තියෙන ස්ටීකරයට යටින් හැංගුන ඇණ තියෙන්න පුලුවන් නිසයි. 
    මේ සේරම අයින් කරත් එක පාරට පියන අරින්න බෑ. දැන් පැතලි තලයක් තියෙන නියනක් අරං පියන හෙමින් උස්සන්න ඕනි. 
එතකොට ඩිස්ක් එකට තදවෙලා තියෙන වායු රෝධක ටික ගැලවෙයි.
                       දැං ඕං බලා ගන්න පුලුවන් හුලංඟක්වත් වදින්න දෙන්නෙ නැතුව ආරක්ෂා කරපු රිදී පාට ඩිස්ක් පොඩිත්තිව! ඒත් එක්කම ඔය තැටියෙ ලියන, කියවන හිසත් බලාගන්න පුලුවන්. ඩිස්ක් එක දිහා බැලුවම තේරෙනව ඇති කොච්චර ඔප වැටිලද කියල. සමහර විට මේවගෙ ඩිස්ක් 2,3 ක් උනත් තියෙන්න පුලුවන්.
                           හොඳට බැලුවොත් පෙනෙයි පැත්තකින් තියෙනවා සුදු පාට පොඩි ස්පොන්ච් එකක් වගේ කොටසක්. ඒක තියෙන්නෙ ජලවාෂ්ප වගේ අහිතකර ද්‍රව්‍ය උරාගන්න.
                         ඊළඟට මේකේ කියවන, ලියන හෙඩ් එක ගලවන්න ඕනි. ඒකට මුලින්ම සර්කිට් බෝඩ් එකට සම්බන්ධවෙන කොටස ගලවන්න ඕනි.  

           මේකෙ ඇණ ගලවල ඊටපස්සෙ පොඩි ප්ලාස්ටික් පතුරක් තියෙනව අදින්න(සමහරවිට නැතිවෙන්නත් පුලුවන්). ඒක ඇදල ගත්තාම මේක ගලවන්න පුලුවන්.
                  ඊට පස්සෙ හෙඩ් එක එහා මෙහා ගෙනියන වැඩ කරන කාන්දම් කෑලි 2 ගලවන්න ඕනි. මේක ඇණ වලින් සම්බන්ධ කරල නෑ. නිකන්ම එකක් උඩ අනික තියල තියෙන්නෙ. මේක ඉතා ප්‍රභල චුම්බකයක්. ඉස්සෙල්ල වගේම පැතලි නියනක් අරගෙන හිමීට උස්සල පිටට ගන්න පුලුවන්.
                           දැං ආයෙත් පැතලි නියන අරගෙන හෙඩ් එක කැරකෙන කොටස කරකවල ඒ ඇණය ගලවල හෙඩ් එක ගලවන්න පුලුවන්.
            ඊටත් පස්සෙ ඉතුරු කාන්දම් කෑල්ලෙ ඇණ අයින් කරල ගලවන්න පුලුවන්.
       ඉතිං මේ තියෙන්නෙ ඩිස්ක් එකේ ඩේටා කියවන ලියන හෙඩ් එක. මේකේ ආම් 2,3ක් තියෙන්න පුලුවන්. ඒ ඩිස්ක් කීපයක ඒවා කියවන්න.
                    ඔන්න දැං පුලුවන් තැටිය ගලවන්න. තැටියෙ සමබරතාව ‍රැකගන්න ඉතා හොඳින් මේ ඇණ තද කරල තියෙනවා. ඒ නිසා මේක නම් ටිකක් අමාරු වෙන්න පුලුවන්.
අවසානයට මෝටරය. මේකනම් කොහොමත් ගලවන්න අමාරුයි.
හම්... ඉතිං මේ තියෙන්නෙ ගලවපු හාඩ් ඩිස්ක් එකේ කොටස් ටික...


September 21, 2016

Chainora - අපිට අපේම Social Media Network එකක්

               මේ පෝස්ට් එක අපේ රටේ වැඩක් ගැන. සෝෂල් මීඩියා ගැන හැමෝම දන්නවා. මේ කියන්න යන්නෙ අලුත් සෝෂල් නෙට්වර්ක් එකක් ගැන. විශේෂත්වය මේක අපේ රටේ නිර්මාණයක් වෙන එකයි.
                මේකෙ නම තමයි Chainora . www.chainora.com ඔස්සේ පිවිසෙන ඕනෑම කෙනෙකුට පහසුවෙන් ගිණුමක් හදාගන්න පුළුවන්. නූතන සමාජ ජාල වෙබ් අඩවියක තියෙන සියලු පහසුකම් Chainora තුල තිබෙනවා. සාමාන්‍ය ජාලයක පවතින අංඟ වන like, comment, share වැනි පහසුකම් වලට අමතරව අපූරු අංගයක් වන්නේ "Nearby Users" ද පවතිනවා. එමගින් තමන් සිටින ස්ථානයෙ සිට 2 km දුරක සිටින යහළුවන් හඳුනා ගැනීමට හැකියාව පවතිනවා

කවුද මේක හැදුවේ???
                  මේ වෙබ් අඩවිය නිර්මාණය කලේ ලකිඳු ජයතිලක විසින්. ඔහු සිටින්නේ රත්මලාන ප්‍රදේශයේ. රෝයල් ඉන්ස්ටිටියුට් ජාත්‍යන්තර පාසලේ මූලික අධ්‍යාපනය සම්පූර්ණ කර ඇති ලකිඳු මේ වන විට ICBT හි මෘදුකාංඟ ඉංජිනේරු උපාධිය හදාරමින් සිටින අතර එය ද මදකට නතර කර මහත් කැපවීමකින් මෙම අඩවිය අවුරුද්දක පමණ කාලයක් වෙහෙස වී නිර්මාණය කර ඇත.
          මෙවැනි ජාලයක මූලීක තාක්ෂණික පදනම පවා ඉතා සංකීර්ණ වන අතර එය ජය ගැනීමට ලකිඳු සමත්ව සිටිනවා .සැප්තැම්බර් මාසයේ දියත් කරනු ලැබූ මෙම ජාලයට මේ වන විට සාමාජිකයන් 1000 අධික ප්‍රමාණයක් එක්වී සිටිනවා .මෙම ජාලය තව තවත් දියුණු කිරීම සඳහා ආයෝජකයකුගේ සහය අවශ්‍ය වී තිබෙනවා. 
                                      ඉතිං මේ වැඩේට අත හිත දෙන්න පුළුවන් කෙනෙක් ඉන්නවා නම් 0758319429 අංකයෙන් හෝ lakindu1.jayathilaka@gmail.com විද්‍යුත් තැපෑල ඔස්සේ  ලකිඳු සමග සම්බන්ද වෙන්න පුළුවන්. දැන්ම ගිණුමක් හදාගෙන එකතු වෙන්න www.chainora.com.

September 7, 2016

සැම්සුන්ග් නෝට් 7 ගිනිගත් හේතුව

සැම්සුන්ග් සමාගමේ නවතම දුරකථනයක් වන ගැලැක්සි නෝට් 7 අර්බුධකාරී උපාංගයක් වූයේ එහි බැටරියේ ඇතිවූ දෝෂයක් හේතුවෙන් ගිනි ගැනීමට ලක්වීමයි. මේ හේතුවෙන් ලොව පුරා අලෙවි කර තිබූ මිලියන 1.5 ක පමණ දුරකතන ප්‍රමාණයක් නැවත ගෙන්වීමට සැම්සුන්ග් සමාගමට සිදුවිය.

මෙම උපාංගය සඳහා යොදාගැනුන බැටරි 70% ක් සැම්සුන්ග් සමාගමේ SDI බැටරි යොදා ගැනූන අතර ඉතීරිය චීනයේ නිපදවූ ATL බැටරි යොදා ගැනින. දෝෂය හටගෙන තිබුණේ SDI බැටරි වලය .එම බැටරි නැවත ආරෝපණයේදී ගිනි ගැනීමට ලක්විය. නිෂ්පාදනයේ සිදුවූ සුළු දෝෂයක් එයට හේතුව බව සොයාගෙන ඇත.එම නිසා නෝට් 7 සඳහා SDI බැටරි යොදා ගැනීම නවතා දැමීමටත් ඒ වෙනුවට ATL බැටරි යොදා ගැනීමටත් සමාගම තීරණය කර ඇත.
සැම්සුන්ග් SDI මුලින්ම සම්බන්ධ වූයේ ගැලැක්සි එස් 6 සඳහා බැටරි නිපදවීමට ය. මෙම සිදුවීමෙන් පසු ඔවුන්ගෙ කොටස් 2.76% කින් පහල වැ‍ටුන අතර ඩොලර් මිලියන 16ක පාඩුවක් සිදුවිය. මේ සිදුවීමෙන් සමාගමට පාඩුවක් විඳීමට සිදු වූවත් සිය නම ‍රැක ගැනීම සඳහා විකුණා ඇති සියලුම දුරකතන වල බැටරි මාරු කිරීමට සැම්සුන්ග් සමාගම තීරණය කර ඇත.

September 4, 2016

ජනපති වෙබ් අඩවිය හැක් කිරීම

          හායි ගායිස්! ආෆ්ටර් ලෝන්ග් ටයිම් අහ්! මේ දවස් වල ලොකුවටම කතා වෙන එකක් තමයි මාතෘකාව. මේ සිද්ධියේ මතුපිටින් පෙනෙන දේට වඩා දෙයක් තියෙනවා. ඇයි මෙහෙම දෙයක් වුනේ ඇත්තටම වැ‍රැද්ද තියෙන්නෙ පාසල් සිසුවා අතේද? පාසල් සිසුවෙකුට පවා ඇතුල් වීමට තරම් වේබ් අඩවිය අනාරක්ෂිත ඇයි?
          අපේ රටේ තියෙන 'පරිගණක යාන්ත්‍රණ' වල ලොකු දුර්වලතාවක් තියෙනවා. ඒ තමයි නිසි පරිදි යාවත්කාලින (Update) නොවීම. මේ කතා කරන්නේ වෙබ් පි‍ටුවල අන්තර්ගතය ගැන නොව බාහිරින් ක්‍රියාත්මක වන මෘදුකාංඟ අට්ටිය ගැනයි. වෙබ් අඩ්වි වේවා ක්ලවුඩ් සේවා වේවා ක්‍රියාත්මක වන්නේ සර්වර් මෘදුකාංගයක පිහිටෙනි.

*සර්වර් මෘදුකාංගයක් යනු...
          සර්වර් මෘදුකාංගයක් යනු එක් විශේෂිත මෘදුකාංගයකි. අන්තර්ජාලයේදී වෙබ් පි‍ටු වලට පිවිසෙන පරිගණක ක්‍රියා කරන්නේ "සේවාග්‍රාහක" (clients) ලෙසයි. වෙබ් පි‍ටු ලබාදෙන පරිගණක හඳුන්වන්නේ සේවාදායක (server) ලෙසයි. පරිගණක බොහෝ ප්‍රමාණයකට එකවර සේවා ලබාදීමට මෙම පරිගණක වලට පුලුවන්. ඒ වගේම දත්ත ගබඩා හසුරවන මෘදුකාංඟ වගේම විශේෂ ආරක්ෂක විධි ද මේවායේ ක්‍රියාත්මක වෙනවා. එනම් වෙබ් අඩවියේ අයිති කරුවන්ට පමණක් ඇතුල් වී අන්තර්ගතය හැසිරවීමට මේ ආරක්ෂක උපක්‍රම යොදාගන්නවා

*වෙලා තියෙන අවුල...
          මේ වෙබ් සර්වර් වල ක්‍රියාත්මක වන ආරක්ෂක උපක්‍රම ටික කාලයකදී කල් ඉකුත්වෙනවා. ඒ කියන්නේ ඒ ආරක්ෂක උපක්‍රම වලින් රිංඟා යන්නට පිටස්තර පුද්ගලයන්ට (හැකර් වරු) හැකියාව ලැබෙනවා. ඉතින් මේවා නිතරම යාවත්කාලීන කල යුතු වෙනවා. නමුත් අපේ රටේ අඩුවෙන්ම දේ ඒක. මේ ගැන හොඳම අත්දැකීම ලැබුණේ ලංකාවේ පාසල් වෙබ් අඩවි ජාලය වන schoolnet සමග වැඩකරන්න යාමේදීය. එය මත සිට පාසල් වෙබ් අඩවි ගොඩනැගීමේදී අලුත් CMS (joomla!, Wordpress) පිහි‍ටුවීම ඉතා අපහසුය. බොහෝ දෙනෙක් නොදන්නවා වූවාට schoolnet ද සයිබර් ප්‍රහාර වලට ගොදුරු වූ සේවයකි. වරක් එල්ලවූ ප්‍රහාරයකදී එම සර්වරයේ ඇති සියලු වෙබ් පි‍ටුවල පින්තූර මකා දැමීය. ඉතිං මෙවැනි ප්‍රහාරවලට එම සර්වර් නඩත්තු කරන්නන්ද එක එල්ලේම වගකිව යුතුය. ජනාධිපතිතුමන්ගේ වෙබ් අඩවියට ප්‍රහාරය එල්ලවූ පසු ඔවුන් එය අලුත් සර්වර් මෘදුකාංඟයකට මාරුකිරීමට කටයුතු කලේය. එය මීට කලින් කල යුතුව තිබූ දෙයකි. මේ දේවල් මහා මුදලක් වැය කල යුතු ඒවා නොවේ. නොමිලේ දෙන සර්වර් මෘදුකාංඟ ඕනෑ තරම් දැන් තිබේ.

*භයානක කම...
          මෙය ඉතා සුලු දෙයක් සේ සමහර අයෙකුට සිතුනද එය එසේ නොවේ. විස්තරය හැටියට මෙම අනවසර ඇතුල්වීමට උදව් දී ඇත්තේ බංගලාදේශ ජාතිකයෙකුයි. ඉතින් එයින් පෙනෙන්නේ පිට ‍රැටියන්ද අපේ රට ගැන ඇස ගසාගෙන සිටින බව නොවේද? ඉතිං එයට අපේ රටේ අයගෙන්ද උදව් ලැබුණු විට?

          සයිබර් ප්‍රහාර වලින් කල හැක්කේ හුදෙක් වෙබ් අඩවි අකර්මන්‍ය කිරීම පමණක් නොවේ. අද විශාල විදුලි බලාගාර, ජල පොම්පාගාර ක්‍රියාත්මක වන්නේ පරිගණක පද්ධති වල උදව්වෙනි. ඉතින් මේවැනි තැනකට එවැනි ප්‍රහාරයක් එල්ල වුවහොත් කෙලින්ම බලපෑම එල්ල වන්නේ සාමාන්‍ය ජන ජීවිතයටය්. අවාසනාවට ත්‍රස්තවාදින්ගේ ද අලුත්ම ඉලක්ක යොමුව ඇත්තේ ද සයිබර් ප්‍රහාර කෙරෙහිය . එවැනි අවදානම් නිසා දැන් බොහෝ රටවල සයිබර් බලකා පිහි‍ටුවා ඇත. සයිබර් බලකා කෙසේ වෙතත් කල යුතු සරල ආරක්ෂක උපක්‍රම කලට වේලාවට සිදුකිරීම ප්‍රමාණවත් ය. එවිට සම්පූර්ණයෙන් කෙසේ වෙතත් අවධානම අවම කර ගැනීමටවත් පුළුවන. නියපොත්තෙන් කැඩිය හැකිදේ පොරොවෙන් කැපෙන තැනට වැඩ කල යුතු නැත.     

May 30, 2016

QR කෝඩ් පැටිකිරිය

කොයි කවුරුත් දන්න බාර් කෝඩ් වගේම තොරතුරු රඳවා තැබිය හැකි තවත් කේත ක්‍රමයක් තිබේ. කිව්-ආර් කෝඩ් (QR Code) ඒ අනෙක් කේත ක්‍රමයයි.වෙබ් අඩවි වලට සබැඳි එක් කිරීම අතින් QR කෝඩ් අද ලෝකයේ ඉතා ජනප්‍රිය ය.
වෙබ් අඩවියකට සම්බන්දයක් දක්වන වෙබ් පි‍ටුවල ඇති හයිපර් ලිංක් මෙන් භෞතික ලෝකයේ ඇති මෙවැනි කේත හාඩ් ලිංක් (hard link) ලෙස ද හඳුන්වයි. එමනිසා QR කෝඩ් 'භෞතික ලෝකයේ හයිපර් ලිංක්' කියා හඳුන්වයි. පොතක, බිත්තියක වැනි ඕනෑම තැනක ඇති මෙවැනි කේතයක් කිව්ආර් රීඩරයකි මෙන්ම, ස්මාර්ට් ෆෝනයකින් ද ස්කෑන් කර එහි ඇති තොරතුරු කියවිය හැකිය.
  • සොයාගැනීම....
QR කෝඩ්  (QR-Quick Response)  තාක්ෂණය සොයාගනු ලැබුවේ ජපානයේ ඩෙන්සෝ වේව් නම් සමාගම විසින් 1994 වසරේදී ය. වාහන අමතර කොටස් නිවැරදිව ගණන් තබා ගැනීමට උපක්‍රමයක් ලෙස මෙය නිර්මාණය කරන ලදී. අදටත් QR කෝඩ් තාක්ෂණයේ පේටන්ට් බලපත්‍ර හිමිකම ඇත්තේ ඩෙන්සෝ වේව් ආයතනයටයි.
  • තාක්ෂණය....

සාමාන්‍ය බාර් කෝඩ් එකකට වඩා මෙහි ඇති වෙනස්කම කියවීමේ පහසුව ම පමණක්ම නොවේ. බාර් කෝඩ් එකක ‍රැඳවිය හැකි සංඛ්‍යාංක(digit) 20 ක ප්‍රමාණයක් වුවත් QR කෝඩ් තුල එම ප්‍රමාණය මෙන් සිය ගුණයක් තොරතුරු ‍රැඳවිය හැකිය. එසේම අකුරු වලට අමතරව පින්තූර පවා මෙයට ඇතුලත් කල හැකිය. ඉලක්කම් නම් 7089 ක් ද අකුරු නම් 4296 ක් ද මේ තුල ‍රැඳවිය හැකිය. එය විශාල දත්ත ප්‍රමාණයකි.
QR කෝඩ් වල දත්ත රඳවන්නේ එහි ඇති කො‍ටු හෙවත් මොඩියුල් තුලය. මෙසේ රඳවා තබන තොරතුරු එය කියවන මෘදුකාංඟයේ ඇති විශේෂිත ඇල්ගොරිතම මගින් පරිවර්ථනය කොට දෙනු ලබයි. මෙයට ගත වන්නේ ඉතා සුළු කාලයකි. මේවාට (QR) කෝඩ් නම සෑදී ඇත්තේ ද එමනිසාය.වැරදීමකින් මේ කොටස් වල සුළු දෝෂ තිබුණ ද, එනම් යම් කොටසක් ඉරී හෝ අපහැදිලි වී තිබුණ ද එම වැරදි නිවැරදි කර ගැනීමට මේවාට පුළුවන. එසේම ස්මාර්ට් ෆෝනයකින් වැනි එකකින් කියවන විට හරියටම එක එල්ලේ අල්ලා කියවිය යුතු නොවේ. එය යන්තම් පෙනෙන ආකාරයට වුවද කියවිය හැකිය.
QR කෝඩ් එකක් සමචතුරස්‍රාකාරය. එහි කෙලවර 3ක එකක් තුල තවකෙක් පිහිටන සේ ඇති සමචතුරස්‍ර 3කි. මේවා ඇස් ලෙස (eyes) හඳුන්වයි. අනෙක් ඉතිරි කෙලවර මුල් චතුරස්‍ර වලට වඩා කුඩා එකක් ඇත. මේ කෙලවර 3 යාකරන තිත් පෙළක් ද තිබේ. ඒවායින් ආවරණය වන ප්‍රදේශයෙහි ඇති තිත් රටාව තුලින් අදාල පණිවිඩය නිරූපණය කරයි. 
  • අලුත් පරම්පරා....

ඩෙන්සෝ වීව් සමාගමට පේටන්ට් බලපත්‍රය අයත් වුවද, මේ තාක්ෂණය දියුණු කරන්න ඕනෑම කෙනෙකුට අවසර ඇත. ඒ අනුව විවිධ පන්නයේ QR කෝඩ් දැන් බිහිවී ඇත. 
*සාමාන්‍ය QR කෝඩ් වලට වඩා කුඩා ප්‍රමාණයේ, අඩු දත්ත ප්‍රමාණයක් (සංඛ්‍යාංක 35 ක්) ‍රැඳවිය හැකි ආකාරයක් තිබේ. එය Micro QR කෝඩ් ලෙස හඳුන්වයි.
*i QR කෝඩ් යනු කුඩා නමුත් වැඩි දත්ත රඳවා තැබිය හැකි මාදිලියකි. මෙහි තිරස්ව හා සිරස්ව මොඩියුල් 422 ක් තිබේ. එහි සංඛ්‍යාංක 40,000 ක් පමණ ‍රැඳවිය හැකිය.
*QR කෝඩ් එකක ඇති දත්ත ඕනෑම අයෙකුට කියවිය හැකි වුවත් එසේ කියවිය නොහැකි මාදිලියක් SCQR (Secure QR code) ලෙස හඳුන්වයි. ඒවා කියවීමට විශේෂිත මෘදුකාංඟ හා රීඩර් අවශ්‍ය වේ.
*Frame QR කෝඩ් නමින් හඳුන්වන මාදිලියේ දත්ත වලට අමතරව කුඩා පින්තූරයක් ද සහිතව මුද්‍රණය කල හැකිය.

*සාමාන්‍ය QR කෝඩ් වලට වඩා නවීකරණය වූ සජීවීකරණය කරන ලද (Animated QR) මාදිලියක් ද දැන් තිබේ.
  • ප්‍රයෝජන....

වෙබ් අඩවි වලට සබැඳි එක් කරනවාට අමතරව විවිධ ප්‍රයෝජන QR කෝඩ් වල තිබේ. නොයෙක් නිෂ්පාදන වල විස්තර අඩු ඉඩක රඳවා තබන්නට මේවා යොදා ගන්න පුලුවන. ඒ නිසා නිෂ්පාදන විස්තර රඳවන්නට එහි ඇසුරුම බාධාවක් නොවේ.පුවත් පත් ලුහුඬු දැන්වීම් පළ කිරීමේදී මේ ක්‍රමය යොදා ගැනීමෙන් අඩු ඉඩක වැඩි දත්ත ප්‍රමාණයක් ගබඩා කල හැකිය.
  • අපිට හදා ගන්න පුළුවන් ද?..... ඔව් අපිටත් පුළුවන්!

තමාට අවශ්‍ය තොරතුරු රඳවා QR කෝඩ් නිර්මාණය කර ගැනීමට නොමිලේ දෙන වෙබ් සේවා රාශියක් දැන් තිබේ.

                 ඒවායින් තනාගන්නා QR කෝඩ් ඉමේජයක් ලෙස ඩවුන්ලෝඩ් කර, අවශ්‍ය නම් මුද්‍රණය කර ඕනෑම තැනක ‍රැඳවිය හැකිය.

>>>>>>>>>>>>>>>>>>>Next post will publish after my exam...! ;)<<<<<<<<<<<<<<<<<<<<<<<

May 21, 2016

ගූගල් I\O 2016 උළෙලේ තතු

ගූගල් සමාගමෙන් ඉදිරියේදී පැමිණීමට නියමිත නිෂ්පාදන හා සේවා පිළිබඳ ලෝකයා දැනුවත් කරන ප්‍රධානතම උත්සවයක් වන්නේ ගූගල් I\O උළෙල යි. එය මේ වසරෙදීත් පැවැත්විණි. මේ එහිදී හෙළි කල ප්‍රධානතම නිපැයුම් කීපයකි.
ඩේ ඩ්‍රීම් VR උපාංඟය
                         අද ලෝකයේ වැඩිම අවධානයක් යොමු වී ඇති තාක්ෂණික උපාංඟයක් ලෙස VR (Virtual Reality ) හෙඩ් සෙට් උපාංඟය හැඳින්විය හැකියි. සැබෑ පරිසරයක් ලෙස පෙනෙන නමුත් සැබෑ ලෙස නොපවතින පරිසරයක් මවා දැක්වීම VR උපාංඟයකින් සිදුකරනු ලබයි. ඩේ ඩ්‍රීම් (Daydream) යනු ගූගල් සමාගමෙන් හඳුන්වා දෙන අලුත් VR උපාංඟයයි. 

                 මෙය අලුත් ඇන්ඩ්‍රොයිඩ් මෙහෙයුම් පද්ධතිය වන Android N සමග ක්‍රියාත්මක වන්නකි. මීට් පෙර ගූගල් විසින් ඕනෑම කෙනෙකුට නිවසේදීම සාදාගත හැකි "කාඩ් බෝඩ්" නම් VR උපාංඟයක් හඳුන්වා දුන් අතර එයට වඩා ඩේ ඩ්‍රීම් උපකරණය බලසම්පන්නය. මේ උපකරණය ක්‍රියාත්මක කිරීමට අවශ්‍ය නව සංවේදක පද්ධති ඇතුලත් ස්මාර්ට් ෆෝන් නිපදවීමට HTC, Huawei, LG වැනි සමාගම් දැනටමත් කටයුතු කරමින් සිටී. 
                       මේ උපකරණය මගින් එදිනෙදා භාවිත කරන ඇප් (You tube, Street View, Play Store) මේ හරහා බලා ගත හැක. එසේම VR උපාංඟය තුල හැසිර විය හැකි නොයෙක් ඇප් තැනීමට ලොව ප්‍රකට සමාගම් ‍රැසක් (The New York Times, HBO, Netflix, Ubisoft,Electronic Arts) ක්‍රියා කරමින් සිටී. කෙසේ වෙතත් මීට අමතරව HTC Vive හා Oculus Rift  යන VR උපාංඟ ද මේ සමග තරඟයට සිටී.

ඇලෝ මැසේජින් 

                    ඉදිරියේදී ඇලෝ (Allo) නමින් චැටින් ඇප් එකක් ද ගූගල් සමාගමෙන් එලි දැක්වෙයි. මෙහි විශේෂත්වය දුරකතන තුල පමණක් ක්‍රියාත්මක කිරීමයි. දුරකතන අංකය ඔස්සේ සම්බන්ධ විය හැකි මෙම ඇප් එක තුලින් ගූගල් ගිණුම් ද භාවිත කල හැක. ඉමෝජි අයිකන්, ස්ටීකර්, රූප මත ඇඳීමේ හැකියාව මෙන්ම පණිවිඩයේ ෆොන්ට් සයිස් වෙනස් කිරීම වැනි හැකියාවක්ද ඇත. Google Assistant මෘදුකාංඟයේ ද සහය ඇති මෙහි කටහඬ මගින් පණිවිඩ වලට ප්‍රතිචාර දැක්වීමේ හැකියාවද සහිතය. තවද ඇලෝ තුලින් යවන පණිවිඩ අන් අයට කියවිය නොහැකි ලෙස එන්ක්‍රිප්ට් කර ඇත. ඒ නිසා ආරක්ෂාවෙන් ද ඉහල තැනක තිබේ.

ඇලෝ සමග ඩුවෝ

             ඇපල් සමාගමේ අයි-මැසෙජ් (iMessage) සමග ක්‍රියාත්මක වන ෆේස් ටයිම් (FaceTime) ඇප් එක මෙන් ගූගල් ඇලෝ සමග ක්‍රියාත්මක වන වීඩියෝ චැට් ඇප් එකක් ඩුවෝ (Duo) නමින් ගූගල් විසින් හඳුන්වා දී ඇත. ඩුවෝ භාවිතයට පහසු ආකාරයට නිමවා ඇති අතර වීඩියෝ ප්‍රීවීව් පහසුකමින් ද සමන්විතයි. ඩුවෝ හා ඇලෝ ඇප් ඇන්ඩ්‍රොයිඩ් හා ඇපල් අයි ඕස් මෙහෙයුම් පද්ධති දෙකෙහිම ක්‍රියාත්මක වේ.

ගෙදරත් ගූගල් ට?

                       Google Home, ගූගල් විසින් හඳුන්වාදෙන නිවාස සහයක උපාංඟයකි. සිලින්ඩරයක් හැඩැති මෙහි ඉදිරියට පෙනෙන ස්පීකරයක් පවතී. මෙය ඇමසන් එකෝ (Amazon’s Echo) උපාංඟය මෙනි. හෝම් තුල ඇති මයික්‍රොෆෝනය තුලින් ඇසෙන හඬට අනුව එහි ඇති ස්පීකරයෙන් පිලිතුරු ලබාදේ. එසේම නිවසේ ඇති විවිධාකාරයේ උපාංඟ සමග ක්‍රියා කිරීමට හෝම් සමත්ය. 
               එසේම 'එකෝ' මෙන් නොව 'හෝම්' උපකරණය නිවසේ විවිධ ස්ථාන තුල ඊට අනුරූප වී ක්‍රියා කල හැකිය. මෙය සමග ක්‍රියා කල හැකි විවිධ බාහිර උපාංඟ නිපදවීමේ පහසුකම (Home’s API) තවමත් ගූගල් සමාගම ලබා දී නැති අතර, ඉදිරියේදී එය ලබා දෙන බව පවසා සිටී.

ඇන්ඩ්‍රොයිඩ් වෙයා හා ඇන්ඩ්‍රොයිඩ් එන්

                      මීට අමතරව ගූගල් සමාගමේ ස්මාර්ට් වොච් එක වන 'ඇන්ඩ්‍රොයිඩ් වෙයා' හි අලුත් සංස්කරණය වන Android Wear 2.0 ඉදිරිපත් කිරීමද මෙහිදී සිදුවිය. දුරකථනය තුල ක්‍රියා කරන ඕනෑම ඇප් එකක් තුලින් විවෘත කර බැලීමේ හැකියාව 'වෙයා' තුල ඇත.
                    ඇන්ඩ්‍රොයිඩ් එන් (Android N) හි අලුත් සුවිශේෂී තා ගැනද මෙහිදී කරුණු හෙලි කෙරුණි. පරිගණක ක්‍රීඩා ක්‍රියා කිරීමට පහසුකම් දියුණු කිරීම, දුරකථනයේ ග්‍රැ‍ෆික් ප්‍රොසෙසරය (GPU) සමග සම්බන්ධ වී ක්‍රියාත්මක වන වඩා හොඳින් 3D ග්‍රැ‍ෆික් පෙන්වන යෙදුමක් ද අලුත් ඇන්ඩ්‍රොයිඩ් එන් සමග පැමිණේ. තවද ඩවුන්ලෝඩ් කිරීමකින් තොරව අන්තර්ජාලයේ සිටම ක්‍රියාත්මක කල හැකි විශේෂිත ඇප් හැසිරවීමේ හැකියාවක්ද පවතී.

ගූගල් කොයිබට ද?
                            මේ ලෙස අලුතින් ඉදිරිපත් කරන්න යන උපාංඟ තුකින් පෙනෙන්නේ ගූගල් සමාගම තව තවත් වෙළඳ පොළ තුල තම අණසක පැතරවීමට උත්සහ කරන් බවයි. ලොව ප්‍රකට සමාගම් වන ෆේස් බුක්, ඇපල්, එච්ටීසී, මයික්‍රෝසොෆ්ට් වැනි සමාගම් සමග කරට කර තරඟයකට ගූගල් පැමිණ තිබේ. අද ලොව වැඩිම දෙනෙක් භාවිතා කරන ස(ර්)ච් එන්ජිම වන්නේ ගූගල් ය. එසේම ගූගල් හි සපයන සේවා ලබාඅ ගැනීමට එක් ගූගල් ගිණුමක් සාදා ගැනීම ප්‍රමාණවත් ය. තවද ඝට්ටනයකින් තොරව මෙම සේවා ඉතා හොඳින් වේගවත්ව ක්‍රියා කරයි. අනෙක බොහෝ සේවා නොමිලේම, උසස් අයුරින් ලබා දේ. එයින් ලැබෙන ආදායමෙන් ගූගල් තවත් දියුනු වේ .ඒ නිසා ගූගල් සමාගමේ වෙළඳ පොළ මුලු ලෝකය තුලම සැලකිය යුතු ලෙස ව්‍යාප්ත වී හමාරය.



ප.ලි:- අපි අද නිදහසේ ඉන්න මේ වෙලාවේ අපේම මිනිසුන් දහස් ගණනකගේ ජීවත ගංවතුරෙන්, නාය යෑමෙන් අහිමි වී තිබේ. තවත් කොටසක් අන්ත අසරණව අවතැන් වී සිටී. මේ ඔවුනට අපේ උදවු අවැසි මොහොතකි. අපට හැකි උපරිම අයුරින් ඔවුනට උපකාර වෙමු. ප‍ටු පාට, පක්ෂ, ජාති බේද වලින් තොරව, ප්‍රසිද්ධියක්, වාසියක් බලාපොරොත්තු නොවී ඔවුන්ට උපකාර කරමු. වැඩි විස්තර දැනගන්න මෙතැනින් කොළඹ ගමයා බ්ලොග් අඩවිය ට පිවිසෙන්න... නැත්නම් athahitha.org ට පිවිසෙන්න......


එකතුවෙන්න...

 
         
 

tech එකේ ඉන්න අය

Contact Form

Name

Email *

Message *

ජනප්‍රිය ලිපි

ආව ගිය අය

page visitor counter

ලිපි කියවා ඇති ගණන

tech සයුර Copyright © 2014 - All rights reserved.