July 6, 2020

400TB ඩේටා දැමිය හැකි ටේප් ඩ්‍රයිව්!

          කැසට් ටේප් අන්තිමට දකින්න ලැබුණු පරම්පරාව 90 දශකයේ ඉපදුන අයයි. දැන් CD (ඒවත් දැන් නැති තරම්), පෙන් ඩ්‍රයිව් තීබුණට ඒ කාලයේ රජ කෙරුවේ කැසට් තමයි.(වැඩිදුර දැනගන්න කැසට් ගැන ලියවුණු ලිපිය කියවන්න.) . දැන් සමාන්‍ය භාවිතයෙන් තරමක් ඈත් උනත්, වැඩි ධාරිතාවක් සහිත දත්ත තැන්පත් කිරීමට හැකිවන පරිදි වැඩි දියුණු කිරීමට විවිධ ආයතන පරීක්ෂණ කරනවා. එහෙම පරීක්ෂණ කරන සමාගමක් වන ජපානයේ Fujifilm සමාගම 400TB තරම් ඩේටා දැමිය හැකි කැසට් ටේප් එකක් නිපදවිය හැකි බව පවසා තිබෙනවා.
            ටේප් ඩ්‍රයිව් වල දත්ත තැන්පත් කිරීමේ උපරිමය දැනට 12TB ට සීමාවී තිබෙනවා. Fujifilm සමාගම පවසන ආකාරයට මේ නව තාක්ෂණයේදී දැනට දත්ත තැන්පත් කිරීමට යොදා ගන්නා Barium Ferrite (BaFe) ආලේපිත පටි වෙනුවට Strontium Ferrite (SrFe) ආලේපිත පටි යොදාගනී. BaFe ආලේපිත පටි තාක්ෂණය පරම්පරා ගණනක් තිස්සේ මතක තැන්පත් කිරීමේ ස්ථාන කුඩා වෙමින් පැමිණ දැන් එහි උපරිමයට පැමිණ තිබේ. ටේප් තාක්ෂණයේදීද පරිගණක ප්‍රොසෙසර් තාක්ෂණයේ ප්‍රකට නියමයක් වන "මූර් නීතිය" (Moore's Law) වන "සෑම අවුරුදු දෙක හමාරකට වරක් ප්‍රොසෙසරයක ඇති ට්‍රාන්ස්සිටර් ප්‍රමාණය දෙගුණයක් වේ" යන නියමය හා සමානව මතක කොටස් කුඩා වෙමින් අවුරුදු දෙක හමාරකට වරක් තැන්පත් කල හැකි ප්‍රමාණය දෙගුණ වෙමින් පැමිණෙයි.
                              මේ එක් එක් ටේප් තාක්ෂණයන් පොදු නියමාවලියක් අනුව නිපදවීමට 1990 IBM සමාගම LTO (Linear Tape-Open) ලෙස සම්මතයක් හඳුන්වා දුන්නා. එහි ප්‍රථම සම්මතය LTO-1 වන අතර දැනට පවතින සම්මතය වන්නේ LTO-8 වේ. LTO-1 හීදී ලෝහ අංශු [metal particle (MP)] භාවිත වූ අතර එහි ගබඩා කල හැකි උපරිමය 100GB විය. LTO-6 සම්මතයෙන් BaFe යොදාගත් ටේප් වල මෙය 2.5TB තරම් උපරිමයක් විය. ඒ අනුව LTO-10 සම්මතයේදී 48TB තරම් ධාරිතාවක් සහිතව නිපදවිය හැකි වනු ඇත. 
                      එය 2022 වසර වන විට වෙළඳපොළට පැමිණෙනු ඇත. 400TB ධාරිතාවක් ලබා ගැනීමට පෙර 2025 දී 96TB ද, 2027 වනවිට 192TB ද 2030 දී 384TB ධාරිතාවන් පැමිණිය යුතුය. Strontium පරමාණු Barium පරමාණු වලට වඩා කුඩා වේ. මේ නිසා පෙරට වඩා කුඩා ඉඩක වැඩි මතක ප්‍රමාණයක් තැන්පත් කිරීමට හැකිවේ.
                       සාමාන්‍ය භාවිතයෙන් ඈත් වුවත් ආයතනික මට්ටමෙන් ඡායාරූප, වීඩියෝ වැනි විශාල ප්‍රමාණයේ දත්ත තැන්පත් කිරීමට බහුලව යොදාගනී. නමුත් දත්ත ප්‍රවේශ කාලය අතින් හාඩ් ඩිස්ක් වලට වඩා වැඩි නමුත් විශාල ප්‍රමාණයේ දත්ත තැන්පත් කිරීමට ටේප් යොදා ගැනීම මූල්‍යමය අතින් වාසිදායක වේ. Fujifilm සමාගම හැරුණු විට ටේප් නිපදවන අනෙක් එකම සමාගම Sony වේ. Sony සමාගම IBM සමාගම සමග එක්ව ටේප් තාක්ෂණය දියුණු කරනු ලබයි. වසර 2026 වනවිට 330TB ධාරිතාවක් සහිත කැසට් ටේප් තාක්ෂණයක් හඳුන්වා දීම ඔවුන්ගේ අරමුණයි.

June 24, 2020

WordPress වල අමතක අමතක වුණු Password අලුත් කරන හැටි.

                                WordPress website එකක පාස්වර්ඩ් එක අමතක උනොත්, ඒ අදාල user ගෙ ඊ-මේල් එකෙන් password එක reset කරගන්න පුළුවන්. ඒත් හදිසියේ වත් ඒ ඊ-මේල් එක වැඩ නැතුව හරි website එකට login වෙන්න බැරි උනොතින් මොකද කරන්නේ? 
  
                   ඉතින් මෙහෙම උනු වෙලාවට WordPress website එකේ database එකට ගිහින් password එක reset කරගන්න පුළුවන්. ඒක කරන පිළිවෙල මේ වීඩියෝ එකෙන් කියලා දීලා තියෙනවා. මේක කරලා තියෙන්නෙ ඩෙස්ක්ටොප් පරිගණකයක xampp server එකේ උනත්, CPanel hosting එකක උනත් මේ විදිහටම වැඩේ ගොඩදාගන්න පුලුවන්. 


Click here to open the video

April 18, 2020

Facebook අලුත් reaction එක

                                Facebook කලින් තිබුණු සාම්ප්‍රදායික පෙනුම වෙනස් කරමින් Like reaction එකට අමතරව like, love, haha, wow, sad, angry reaction එකතු කලා මීට ටික කාලයකට කලින්. දැන් අලුත් ආරංචි අනුව තවත් reaction එකක් එකතු වෙන්න නියමිතයි. ඔවුන් කියන විදිහට නම් මේක ගොඩක් අය ඉල්ලපු reaction එකක්.
                                 අප්‍රේල් 17 වෙනිදා Messenger සඳහා මේ විදිහට අලුත් reaction එකක් එකතු කලා “care” නමින්. Facebook සඳහා හඳුන්වා දෙන මේ අලුත් reaction එක virtual hug ලෙස හඳුන්වා තිබෙනවා. එය හැඩයෙන් දම් පැහැති හදවතක් තුරුල් කර සිටින කහ පැහැති  මුහුණක් 😛. 
                         Facebook හි සන්නිවේදන කළමණාකරුවකු වන Alexandru Voica මේ ගැන පවසා තිබෙන්නේ මේ ගතකරන අපහසු කාලයේ පරිශීලකයින් හට තම මිතුරන් ගැන සිතන බව පෙන්වීමට reaction එකක් අවශ්‍ය තිබූ බවයි. ඒ අනුව මේ නව virtual hug reaction එක හඳුන්වා දෙනු ඇති බවයි.
                               Messenger හි ප්‍රධානියා වෙන Fidji Simo පවසා සිටියේ ඔවුන් හඳුන්වා දුන් care reaction එක දැනට ඇති sad හා love යන reaction ද සමග පරිශීලකයි හට සිය හැඟීම් ප්‍රකාශ කිරීමට භාවිතා කිරීමට ලොකු පිටුවහලක් වූ බවයි. virtual hug reaction එක දැනටමත් Messenger සමග ඇති අතර ඉදිරි සතිය වන විට බොහෝ විට Facebook තුලට එක් වනු ඇති.
                                   ඔවුන් පවසන ආකාරයට reactions නිසා පුද්ගලයෙකුට තම හැඟීම් වචනයෙන් හෝ භාෂාවේ බාධාවකින් තොරව ප්‍රකාෂ කිරීමේ හැකියාව ලැබී ඇති බවයි. අලුත් virtual hug reaction එකද ඉදිරියේදී එයට තවත් පිටුවහලක් වනු ඇත.

April 15, 2020

අලුතින් එන iPhone SE!

                      ඇපල් විසින් ඊළඟට පැමිණීමට තිබූනේ iPhone 9 වන නමුත් 2016 දී පැමිණි iPhone SE මාදිලිය නවමු විශේෂාංඟ සමග නැවත වෙළඳපොලට නිකුත් කිරීමට ඔවුන් තීරණය කර තිබෙනවා. ඒ අනුව මීළඟට පැමිණීමට ඇත්තේ iPhone SE 2020 යි.                             
                      මෙම මස 24 වන දා මෙය වෙළඳපොළට නිකුත් කිරීමට නියමිතයි. එසේම මේම මස 17 දා සිට පෙර ඇනවුම් සඳහා විවෘතව පවතිනවා. මෙහි මිල $399 (ලංකාවේ මුදලින් රු. 77,000 පමණ) වනු ඇති බව පැවසෙනවා. 64GB, 128GB, 256GB ලෙස මෙය පැමිණෙනවා.
                 මෙහි නිමාව හා හැඩය පැරණි iPhone යේ (iPhone 8,7) ලෙස නිකුත් වන මෙහි අඟල් Retina HD Display එකක් පවතිනවා. එහි පැරණි මාදිලියේ පැවති පරිසර තත්වයන් වලට තිරයේ ආලෝක ප්‍රමාණය සකසන TrueTone තාක්ෂණය සමග පැමිණෙනවා. අලුත් iPhone හි තිබුණු FaceID හා virtual button එකට කැමැත්තක් නොමැති වූ අයට නැවත තිරයට පහතින් සුපුරුදු Home බොත්තම සමග TouchID පැමිණෙනවා. නමුත් මෙහි 3.5mm Headphone jack එක ලැබෙන්නෙ නෑ. ඒ වෙනුවට Lightning Port එකට සවි කල යුතු ඇඩැප්ටරය ලබා ගත යුතු වෙනවා. මෙයට ජලයට හා දුහුවිල්ලට ඔරොත්තු දෙන IP67 සහතිකය ඇත.
                  මෙහි නිමාව පැරණි වුවත් අන්තර්ගතය අලුතින් පැමිණි අයිෆෝන් මාදිලිවල ඇති බලය ඇතිවන ලෙස නිර්මාණය කර තිබෙනවා.මෙහි පවතින්නෙ iPhone 11 හි පැමිණි A13 Bionic චිපයයි. ඇපල් සමාගම පවසන ආකාරයට මෙය 2016 ආ පැරණි iPhone SE ට වඩා දෙගුණයක් වේගවත් වේ. බැටරි බලය පෙර පැවති iPhone 8 හි මෙන් එක් වරක් චාර්ජ් කිරීම මගින් පැය 12 ක් භාවිතා කල හැකි වන මෙහි අලුත් පහසුකමක් ලෙස වයර්ලස් චාර්ජින් පැමිණෙනවා. මෙහෙයුම් පද්ධතිය ලෙස නව iOS 13 ක්‍රියාත්මක වන නිසා අලුතින් පැමිණි මෘදුකාංඟ හා විශේෂාංඟ මෙහි අත්විඳීමට පුළුවන්.
                      නව iPhone SE 2020 හි කැමරාව 12MP , f/1.8 aperture වන අතර iPhone 11 හි මෙන් ඉතා සුපැහැදිලි පින්තූර ලබා ගැනීමටත් full gamut of effects සහිතව portrait mode ඡායාරූප ගැනීමට හැකියාව ඇති මෙහි තත්පරයකට ෆ්‍රේම් 60 ක වේගයක් ඇතිව 4K වීඩියෝ පටිගත කිරීමේ හැකියා පවතී. කලු, සුදු හා රතු යන වර්ණ වලින් මෙය ලබා ගැනීමට හැකියාව ලැබේ.
                           පෙර සිට පැවති iPhone හි හැඩය හා නිමාව අලුත් සංස්කරණ වලදී වෙනස් වීම පාරිභෝගිකයින් එතරම් යහපත් ලෙස පිළිගෙන නැති බව ඇපල් සමාගම පිලිගත් නිසාදෝ පැරණි මාදිලිය නැවත වෙළඳපොලට නිකුත් කිරීමෙන් ඔවුන් නැවතත් පෙර පැවති සිය ආදිපත්‍ය ලබා ගැනීමට උත්සහ ගනිමින් සිටී. කෙසේ වෙතත් මේ නව iPhone SE 2020 රසිකයන් විසින් උණුසුම් ලෙස පිලිගනු ඇත.

(Photo Credit: https://www.apple.com/)

April 8, 2020

Covid-19 මැඩලන්න ඔබේ පරිගණකයත් දෙන්න.

                        මාස හතරකින් විතර දාන පළවෙනි ලිපිය. ලෝකෙම කණපිට හැරිලා. Corona නැත්නම් Covid-19 වෛරසය ආසානය වීම නිසා මුලු ලෝකයේම මිනිස්සු ප්‍රීඩා විඳිනවා. ඒත් එහෙම කියලා එලිමහනට බැහැලා වැඩ කරන්න යන්න බෑ. කරන්න පුළුවන් ලොකුම උදව්ව ගෙදරට වෙලා ඉන්න එක. කොච්චර දියුණු උනත් තවමත් හරි හැටි බෙහෙතක් Covid-19 වෛරසයට නෑ. ඉතින් ගෙදර ඉඳන් මේ වැඩේට උදව් කරන විදිහක් තමයි මේ කියන්න යන්නේ.
මොකද්ද Folding@Home ?
                 Covid-19 වෛරසයට බෙහෙතක් හොයාගන්න ලොව පුරා ඉන්න විද්‍යාඥයන්ට ගොඩක් මහන්සි වෙන්න වෙලා. මේ විදිහට බෙහෙත් හොයන්න ගොඩක් පරීක්ෂණ වගේම ලොකු ගණනය කිරීම් කරන්න ඕනිවෙනවා. ප්‍රායෝගිකව මේවා මිනිස් මොළයෙන් විසඳන්න ගියොත් අවුරුදු ගාණක් ගතවෙන්න පුළුවන්. ඒ නිසා මේ ගණිත ගැටලු පරිගණකය මඟින් විසඳන එක තමයි තරමක් හෝ ලේසි වෙන්නෙ. ඒත් මේ ගැටලු විසඳන්න දැනට තියෙන පරිගණක බලය ප්‍රමාණවත් නෑ. ඒ නිසා ලෝකය පුරා තියෙන පරිගණක වල බලය භාවිතා කරලා මේ පරීක්ෂණ කරන්න ව්‍යාපෘතියක් Folding@Home නමින් පටන් අරගෙන තියෙනවා. මේ ව්‍යාපෘතියෙ ඉන්න පරීක්ෂකයින් Corona වෛරසයේ ඇති ප්‍රෝටීන ක්‍රියාකරන ආකාරයත් ඒවා නැවැත්විය හැකි ප්‍රතිජීවක නිර්මාණය කරන හැටි ගැනත් පරීක්ෂණ කරනවා. මේ ගැන හරි විස්තරයක් F@H වෙබ් අඩවියේ දාපු ලිපියකින් දැනගන්න පුළුවන්. 

කරන්නෙ මෙහෙමයි
   මුලින්ම කරන්න තියෙන්නෙ https://foldingathome.org/ කියන වෙබ් අඩවියට ගිහින් ඒකෙන් දෙන software download කරගන්න එක.

                 ඊට පස්සෙ ඒ සෙටප් එක සාමාන්‍ය විදිහට install කරගන්න ඕනි. ඊළඟට මේක system tray එකේ අයිකන් එකක් විදිහට පෙන්වනවා.
                    ඒත් එක්කම වෙබ් බ්‍රව්සර් එකෙන් control panel එක open වෙනවා. එතනදි අපිට අනන්‍යතාවක් නැතුව (Anonymous) විදිහට හරි User name දීලා ඒ විදිහට හරි ඉදිරියට යන්න පුළුවන්.
                      ඊළඟට control panel එකේ මේක පාලනය කරන්න පුළුවන් වින්ඩෝ එකක් බලාගන්න පුළුවන්.
1. උදව් කරන පරීක්ෂණය මොකද්ද කියලා මෙතනින් තෝරන්න පුළුවන්
2. පරිගණකය උදව් වෙන ගණනට Point එකතු වෙනවා. ඒක මෙතනින් බලන්න පුළුවන්.
3. දැනට පරිගණකයේ CPU එක මේ වැඩේට යෙදවෙන ගණන බලන්න පුළුවන්. ඒක Light , Medium, Full කියන විදිහට තෝරන්න පුළුවන්.
4. කොතරම් බලයක් යොදවනවාද යන එක තෝරන්න මෙතනින් පුළුවන්.
5. වැඩ කරන වෙලාවද (While I'm working) නැත්නම් වැඩක් නැති වෙලාවට(Only when idle) ද බලය ගන්න ඕනි කියන එක.
6. නවත්වන්නයි, පටන්ගන්නයි මේ බට්න් එකෙන් පුළුවන්.

අවුලක් වෙයිද?
               ප්‍රෝග්‍රෑම් එක වැඩ කලා කියලා කොම්පියුටර් එක slow වෙන්නෙ වත් වෙන මොකුත් අවුලක් වෙන්නෙවත් නෑ. මේ වැඩේට දායක වෙන එක එක අතකින් ලොකු පිනක්. ඒ වගේම දවසක බෙහෙතක් හොයාගත්තොත්, ඒකට දායක උනු එක ගැන හිතින් සතුටු වෙන්නත් ලෝකයාගේ යහපත වෙනුවෙන් ගෙදර ඉඳන්ම උදව් වෙන්නත් පුළුවන් වෙනවා.

January 22, 2020

EDGE බ්‍රව්සරය Chromium වෙයි

                                            පරිගණක ලෝකයේ එක එක තරඟ නිතර දකින්න පුළුවන්. මෙහෙයුම් පද්ධයති අතර තියෙන තරඟයටත් වඩා බ්‍රව්සර් අතර ඇති තරඟය ඉතා තියුණුයි. "බ්‍රව්සර් යුද්ධය" කියලා කියන්න තරම් එය තරඟකාරීයි.
                                             අන්තර්ජාලය බිහිවූ මුල් කාලයේ තිබූ යුද්ධයෙන් Netscape Navigator පරදා Internet Explorer ජයගත්තත් පසුකාලීනව Google Chrome පැමිණීමත් සමග Internet Explorer වලට නරක කාලයක් අත් වුණා. මේ නිසා Microsoft සමාගම එම ව්‍යාපෘතිය නවතා දමා Edge නමින් අලුත් වෙබ් බ්‍රව්සරයක් Windows 10 සමග ලබා දීමට කටයුතු කලා. නමුත් එයත් සිතූ තරම් ජනප්‍රිය වුණේ නෑ. මේ නිසා නව ලෝගෝවක් ද සහිතව අලුත් Edge බ්‍රවුසරයක් Google Chrome ගොඩනගා ඇති chromium වෙබ් බ්‍රවුසරයේ කේතය මත පදනම්ව මීට දින 6 කට පෙර නිකුත් කරනු ලැබුවා. 
                                               මෙය වින්ඩෝස්, මැක් හා ලිනක්ස් යන සියලු මෙහෙයුම් පද්ධති වලට ලබාගත හැකි අතර පෙරට වඩා වැඩි ආරක්ෂාවක්, 4K Video Streaming, Windows 10 සඳහා වඩා වැඩිදියුණු කිරීම් සහිතව Google Web Store හා Microsoft Store හි ඇති extension වලට සහය ඇතිව පැමිණෙයි.
                                                   Microsoft සමාගම පවසන ආකාරයට නව සංස්කරණය පෙර පැවති එකට වඩා දෙගුණයක් වේගවත් බවයි. එහි තේරුම Chrome බ්‍රව්සරය කලින් පැවති Edge බ්‍රව්සරයට වඩා හොඳ බවයි. දැන් ඉතින් බලා සිටිය යුත්තේ අලුත් Edge බ්‍රව්සර් එක පරිශීලකයින් කෙලෙස භාර ගනීද යන්නයි. මෙවරත් අසාර්ථක වුවහොත් Edge ට ද හිමිවන්නේ Internet Explorer වලට අත් වූ ඉරණමමය.

Follow us...

 
         
 

tech Followers

Contact Form

Name

Email *

Message *

ජනප්‍රිය ලිපි

ලිපි එකතුව

ආව ගිය අය

page visitor counter

ලිපි කියවා ඇති ගණන

tech සයුර Copyright © 2014 - All rights reserved.