tech සයුර

September 16, 2018

Raspberry Pi පාඩම : Tiny RTC මොඩියුල සවි කරමු

Raspberry Pi කියන්නෙ මයික්‍රොකොන්ට්‍රෝලර් වලට වඩා එහා ගියපු පහසුකම් තියෙන පරිගණක උපාංඟයක් කියලා ගොඩක් දෙනෙක් දන්නවා ඇති. ඉතිං මේ වටිනා කියන උපකරණයෙන් කරන්න පුළුවන් වැඩ ගොඩයි. ඉතිං ඒ දේවල් වලින් දන්න දේවල් ටික මේ විදිහට කියලා දෙන්න හිතුවා.

Raspberry Pi බෝඩ් එක එකලස් කරගන්න විදිහ ගැන, ඒකෙ අනෙක් විස්තර ගැනත් පෝස්ට් එකක් නොලිය මේකෙන් කරන වැඩ ගැන විතරක් ලියන්න හිතුවා. ඒත් කෙනෙක්ට ඕනි නම් ඒ ගැන දැනගන්න, අලුත් පෝස්ට් එකකින් කියලා දෙන්න පුළුවන්.

Raspberry Pi කියන්නෙ අඩු මිලට දෙන්න හදපු, ගොඩක්ම IoT වගේ project එක්ක වැඩ කරන්න හදපු පරිගණකයක්. ඉතිං ඒකට සාමාන්‍ය පරිගණකවල එනවා වගේ Hardware Clock එකක් නෑ. මේ හින්දා RPi බෝඩ් එකේ වෙලාව ඉන්ටනෙට් එකට සම්බන්ධ වුණාම ඉබේම ntp (nework time protocol) හරහා දිනය, වෙලාව අප්ඩේට් වෙනවා. ඒත් ඉතිං ඉන්ටනෙට් නැති හැම වෙලාවටම මේකෙ වෙලාව වෙනස් වෙනවා. ඒකට විසඳුමක් විදිහට අපිට Tiny RTC මොඩියුල් එකක් RPi බෝඩ් එකට හයි කරගන්න පුළුවන්.

➥Tiny RTC මොඩියුලය ගැන.

Tiny RTC (Real Time Clock) කියන්නේ DS1307 කියන චිප් එක (DS3231, PCF8523 මොඩල් එකේ චිප් එහෙමත් තියෙනවා) පාදක කරගෙන හදපු කුඩා ඩිජිටල් ඔරලෝසුවක්. මේකත් එක්ක සන්නිවේදනයට I²C protocol එක භාවිතා වෙනවා.විදුලිය නැති වෙලාවට වැඩ කරන්න කොම්පියුටර් වල තියෙන වර්ගයේ, CR1225 කියන ලිතියම් බැටරි කෑල්ලක් මේ මොඩියුල් එකත් එක්ක එනවා.

➥වයරින් කරන හැටි.

මොඩියුල් එක කෙලින්ම බෝඩ් එක පාස්ස ගන්නෙ නැතුව බ්‍රෙඩ් බෝඩ් එකක ටෙස්ට් කරන්න. මොඩියුල් එකේ VCC, GND, SDA, SCL, DS විදිහට පින් 5 ක් බලා ගන්න පුළුවන්. ඒකෙන් DS කියන පින් එක හැර අනෙක් පින් රාස්බෙරි බෝඩ් එකට සම්බන්ධ කරගන්න ඕනි.

VCC - 5v (PCF8523 හෝ DS3231 නම් 3.3v වලට)

GND - GND

SDA - RPi හි GPIO හි ඇති SDA පින් එකට

SCL - RPi හි GPIO හි ඇති SCL පින් එකට

(learn.adafruit.com)

➥රාස්බෙරි බෝඩ් එක සූදානම් කිරීම

මුලින්ම රාස්බෙරි බෝඩ් එකේ I²C සක්‍රිය කරන්න ඕනි. I²C වල තියෙන විශේෂත්වය තමයි දත්ත ගමන් කරන්න වයර් දෙකක් විතරක් වගේම අනෙක් සියලු මොඩියුලත් ඒ වයර් දෙකටම සම්බන්ධ කරන්න පුළුවන් වෙන එක. ඒ හැම මොඩියුල් එකකටම අනන්‍ය වුණු ලිපිනයක් ලැබෙනවා.

දැන් I²C enable කරන විදිහ බලමු. ඒකට මුලින්ම පහලින් තියන කමාන්ඩ් දෙක ටර්මිනල් එකේ ටයිප් කරන්න. ඒ I²C වලට ඕනි කරන පැකේජ දෙකක් ඉන්ස්ටෝල් කරන්න.

sudo apt-get install -y python-smbus

sudo apt-get install -y i2c-tools

දැන් sudo raspi-config කියන කමාන්ඩ් එක ටයිප් කරලා RPi Configuration වින්ඩෝ එක ඕපන් කරගන්න ඕනි.

ඊට පස්සේ Interfacing Options තෝරගෙන්න (පරණ os එකේ Advanced Options)

ඒකෙන් I²C තෝරලා Enable කරන්න ඕනි.

දැන් වැඩේ හරි..ඊළඟට sudo reboot කමාන්ඩ් එකෙන් RPi එක Reboot කරන්න ඕනි. රීබූට් උනාට පස්සේ ටර්මිනල් එකේ sudo i2cdetect -y 1 (පරණ os එකේ sudo i2cdetect -y 0) ටයිප් කරලා enter කරාම මෙන්න මේ වගේ output එකක් එනවනම් වැඩේ සාර්ථකයි. ඒ වෙලාවෙ මොඩියුල් එක සම්බන්ධ කරන්නෙ නැතුව මේක කරලා බලන්න.

➥මොඩියුල් එක චෙක් කරමු

උඩින් කියපු විදිහට මොඩියුල් එක සම්බන්ධ කරලා sudo i2cdetect -y 1 කමාන්ඩ් එක ටර්මිනල් එකේ දුන්නම මෙන්න මේ විදිහට 0x68 කියලා ඇඩ්‍රස් එකක් පෙන්නවනම් වැඩේ ගොඩ.!

➥කමාන්ඩ් වැඩ ටික

හාඩ්වෙයා වැඩ ටික හරියට කරානම් දැන් මේ විදිහට RPi එකට Tiny RTC එක හඳුන්වලා දෙන්න පුළුවන්. මුලින්ම sudo nano /boot/config.txt කියලා කමාන්ඩ් එක දීලා configuration එකට යන්න ඕනි. එතනදී # ලකුණ නැති හිස් තැනක පහලින් දීලා තියෙන කමාන්ඩ් වලින් තමන්ගෙ ලඟ තියෙන මොඩියුල් එකේ චිප් එකට අදාල කමාන්ඩ් එක දෙන්න ඕනි.

DS1307 නම් → dtoverlay=i2c-rtc,ds1307

PCF8523 නම් → dtoverlay=i2c-rtc,pcf8523

DS3231 නම් → dtoverlay=i2c-rtc,ds3231

ඊට පස්සේ Ctrl+X ඔබලා exit වෙනකොට ෆයිල් එක සේව් කරන්න අහයි. ඒකෙදි y අකුර ටයිප් කරලා enter කරන්න. ඊලඟට sudo i2cdetect -y 1 කමාන්ඩ් එක ආයෙත් ටර්මිනල් එකේ දුන්නම කලින් තිබුණ 0x68 කියන එක 0xUU කියලා වෙනස් වෙලා තියෙනවා පෙනේවි.

දැන් කරන්න තියෙන්නෙ කලින් තිබුණ fake hwclock එක වෙනුවට මේ අලුත් 'real' hwclock එක සෙටප් කරන එක. ඒක කරන්න මෙන්න මේ කමාන්ඩ් ටික පිළිවෙලට ටර්මිනල් එකේ දෙන්න ඕනි.

sudo apt-get -y remove fake-hwclock

sudo update-rc.d -f fake-hwclock remove

sudo systemctl disable fake-hwclock

දැන් fake hwclock එක off වෙලා තියෙන නිසා තවත් ඒක වැඩ කරන්නේ නෑ. ඒ නිසා sudo nano /lib/udev/hwclock-set කමාන්ඩ් එක දීලා ඒකෙ පහලින් දීලා තියෙන කමාන්ඩ් එක # දාලා කමෙන්ට් කරන්න ඕනි.

#if [ -e /run/systemd/system ] ; then

# exit 0

#fi

➥ඔරලෝසුවේ වෙලාව හදමු.

sudo hwclock -D -r කියන කමාන්ඩ් එකෙන් ඕනෙම වෙලාවක RPi එකේ වෙලාව කියවන්න පුලුවන්.

ඒත් සමහරවිට වෙලාව වැරදී ඇති. ඒ අලුතින් එකතු කරපු මොඩියුල් එකේ වෙලාව හරියට හදලා නැති නිසා. මුලින්ම date කියන කමාන්ඩ් එක දීලා වෙලාව හරිද කියලා බලන්න. වැරදියි නම්, RPi එක ඉන්ටනෙට් එකට කනෙක්ට් කරලා sudo hwclock -w ටයිප් කරලා enter කරන්න. ඒකෙන් මොඩියුල් එකේ වෙලාව update වෙයි. දැන් ආයෙත් date කියල ගහලා බලන්න වැඩේ හරි ඇති. ඊලඟ සැරේ RPi එක ඔන් කරනකොට ඉන්ටනෙට් නැතත් වෙලාව වැඩ.!

Read More

September 12, 2018

අලුත් වුණු ක්‍රෝම් වෙබ් බ්‍රවුසරය

ඉන්ටනෙට් යන ලොකු කුඩා කවුරුත් වැඩියෙන්ම භාවිතා කරන සර්ච් එන්ජින් එක තමයි ගූගල්. ඉතින් දැන් ඇල්පබට්(Alphabet) (කලින් ගූගල්ම තමයි) සමාගමට අයිති ගූගල් සමාගමේ ඉන්ටනෙට් එක බ්‍රවුසර් භාවිතය කනපිට හරවපු නිපැයුමක් තමයි ගූගල් ක්‍රෝම් කියන්නෙ. ඉස්සර ඉන්ටනෙට් යන්න ගත්ත ඉන්ටනෙට් එක්ස්ප්ලොරර් පැත්තකට විසිවී ගියේ ක්‍රෝම් හි පැමිණීමත් එක්කයි.

ඉතින් මේ ක්‍රෝම් බ්‍රවුසර් එක කොතරම් දෙනා වැඩ ගත්තත් අලුතින් අප්ඩේට් ආවත් වැඩි වෙනසක් පෙනුමෙන් දකින්න ලැබුණේ නෑ. ඒත් අවුරුදු 10කට පස්සෙ ආපු අලුත්ම අප්ඩේට් එකෙන් ක්‍රෝම් ටිකක් අලුත් පෙනුමක් අරගෙන තියෙනවා.

➤ප්‍රධාන වෙනස්කම්

ක්‍රෝම් බ්‍රවුසර් පරම්පරාවේ කලින් ඒවට වඩා දකින්න තියෙන ලොකුම වෙනස්කම තමයි කලින් තිබුණ හතරැස් ටැබ්, ඇඩ්‍රස් බාර් (omnibox) එක වෙනුවට තරමක් වටකුරු හැඩති ඒවා විදිහට වෙනස් කරලා තියෙනවා. සමහරු අහයි ඒකෙන් ඇති වැඩේ මොකද්ද කියලා. ගූගල්ලා කියන විදිහට ඒකෙන් ටැබ් කිහිපයක් සමග කරන වැඩකදී ඉතා පහසුවෙන් ටැබ් හදුනාගෙන පුළුවන් වෙනවා.

➤අලුත් වැඩ

තව වෙනස් කමක් තමයි සමහර විස්තර (ප්‍රවෘති, කාලගුණය, ක්‍රීඩා විස්තර) අලුතෙන් ටැබ් එකක් ඕපන් නොකර ඔම්නි බොක්ස් එක නැත්නම් ඇඩ්‍රස්බාර් එකෙන්ම දර්ශණය කිරීම. උදාහරණයක් විදිහට අද දිනයේ කාලගුණ තත්වය දැන ගන්න ඒ ගැන ඔම්නි බොක්ස් ටයිප් කිරීම විතරක් ප්‍රමාණවත් වෙනවා. එතකොට ඊට පහලින් ඒ විස්තර පෙන්වන්න ක්‍රෝම් බ්‍රවුසරයට පුළුවන්. ඒකට අලුත් ටැබ් එකක් ඕපන් කරන්න ඕනි නෑ.

ඒ වගේම වෙබ් අඩවි හැසිරවීමේ පහසුව වෙනුවෙන් ඉබේ පිරවෙන දත්ත (Autofill Data) හැසිරවීම තවත් දියුණු කරලා තියෙනවා. යම් ෆෝමයක් පිරවීමේදී ඊට අවශ්‍ය දත්ත (නම, ලිපිනය, ක්‍රෙඩිට් කාඩ් විස්තර) නිවැරදිව හඳුනාගෙන ඊට අදාල දත්ත ගූගල් ගිණුමෙන් ලබාගෙන සම්පූර්ණ කරන්න අලුත් ක්‍රෝම් බ්‍රවුසරයට පුළුවන්. අලුත් ගිණුමක් වෙබ් පිටුවක හදන වෙලාවටත් ඒකට ඕනි වෙන ශක්තිමත් පාස්වර්ඩ් ඉබේම නිර්මාණය කරන්න වගේම ඒවා ගූගල් ගිණුමේ රඳවාගෙන නැවත පිවිසෙන වෙලාවට ඒවා ඩෙස්ක්ටොප් වගේම මොබයිල් ඩිවයිස් වලදීත් ඉබේ පුරවා දෙන්නත් පුලුවන් . අලුත් සංස්කරණය ලිනක්ස්,වින්ඩෝස් මැක් කියන ඩෙස්ක්ටොප් පරිගණක වල වගේම ඇන්ඩ්‍රොයිඩ් හා ඇපල් අයි ඕඑස් එකටත් ලබාදෙනවා .

ඉන්ටනෙට් නැතිවුණ වෙලාවට මතුවෙන ඩයිනෝසර් ගේම් එකත් ක්‍රෝම් වල තියෙන ජනප්‍රිය අංඟයක්. මේ ගේම් එකේ ඉස්සර තිබුණ පතොක් ගස් ටිකට අමතරව උපන්දින කේක්, තොප්පි, බැලූන් වගේ අලුත් කැලී එකතු කරලා තියෙනවා.

➤ආරක්ෂක උපක්‍රම

වෙබ් බ්‍රවුසර් කියන්නේ දත්ත ආරක්ෂාව අතින් වැඩි අවදානමක් තියෙන කොටසක්. ඉතිං අලුත් ක්‍රෝම් බ්‍රවුසරයේ ආරක්ශාවට කෘතිම බුද්ධි (AI / Machine learning) තාක්ෂණය එකතු කරලා අනර්ථකාරී වෙබ් පිටු (Phishing,Malware sitem) හඳුනාගැනීමේ තාක්ෂණය දියුණු කරලා තියෙනවා.

➤තව දුරටත් සාම්ප්‍රදායික බ්‍රවුසරයක් නෙවෙයි

AI තාක්ෂණය සහයෝග කරගෙන සුපුරුදු බ්‍රවුසර් ක්‍රියාකාරීත්වයට එහා ගිය පහසුකම් කීපයක් අලුත් ක්‍රෝම් සංස්කරණය අරගෙන ඇවිත් තියෙනවා. උදාහරණයක් විදිහට කවුරුහරි කෙනෙක් ගායකයෙක් ගෙ සින්දුවක් හොයාගෙන එයාගේ විස්තර හෙව්වා කියලා හිතමු. එතකොට බ්‍රවුසරය මේ දත්ත හඳුනගෙන ඒ ගායකයාගේ ඉදිරි ඇල්බම , ප්‍රසංඟ වල විස්තර සොයා දෙන්න පුලුවන්. ඒ වගේම නිවාඩු ගත කිරීමට සුදුසු ස්ථාන, හෝටල් , ගුවන් ගමන් වෙන්කරවාක්කරන්න කරන්න වෙනත් ලිපි ලේඛන කටයුතු වලට බුද්ධිමත්ව සහය ලබා දෙන්න ක්‍රෝම් බ්‍රවුසරයට දැන් පුලුවන්.

මේ සියලු පහසුකම් හා සේවා වල අරමුණ ගතවූ වසර 10 සේම ඉදිරි වසර 10 ට ගැලපෙන ලෙස සිය සමාගමේ වැදගත්ම කොටසක් වන ක්‍රෝම් වෙබ් බ්‍රවුසරය ඉහලින්ම ඔසවා තබන්නයි.

‘We think of the browser as the window to the web,’”-Sundar Pichai(CEO Google)

“A decade later, it’s still the tool people use to access all of the websites and applications that help them do what they want to do. As Chrome heads into the next 10 years, we want to expand that window—so you can see more and do more.” - Rahul Roy-Chowdhury, Google’s vice president of product management

Read More

August 31, 2018

ෆෝන් එකේ IMEI අංකය ගැන

IMEI අංකය කියන්නෙ ෆෝන් වල තියෙන එකිනෙකට වෙනස් එක් එක් උපාංඟයට අනන්‍ය වුණු අංකයක්. ඇත්තටම IMEI අංකයෙන් ඇති වැදගත්කම මොකද්ද? ෆෝන් එකේ IMEI එක නිවැරදි එකක්ද කියලා බලන්නෙ කොහොමද? මේ ලිපිය ඒ ගැනයි.

➥IMEI අංකය

International Mobile Equipment Identity කියන දිග නම කෙටි කරලා තමයි IMEI කියන කෙටි නම හැදිලා තියෙන්නෙ. මේ අංකය හරියට NIC අංකය වගෙයි. ඒ අංකෙන් පුද්ගලයන් අනන්‍යව හඳුනාගන්නවා වගේ මොබයිල් ෆෝන් අනන්‍යව හඳුනාගන්න IMEI අංකයෙන් පුළුවන්. IMEI අංකය අංක 15 කින් සමන්විත වෙනවා.ෆෝන් වල නම් *#06# ටයිප් කරලා මේ අංකය බලා ගන්න පුළුවන්. ෆෝන් වලට විතරක් නෙවෙයි GSM තාක්ෂණය භාවිතා කරන මොඩමයක් අඩංගු උපකරණ වල මේ අංකය ඇතුලත් වෙනවා .IMEI ප්‍රධාන අරමුණ ආරක්ෂක උපක්‍රමයක් ලෙස භාවිතා කිරීමයි.

GSM ජාල වලදී ජාලයට සම්බන්ධවන දුරකතන හඳුනා ගැනීමට IMEI අංකය භාවිතා වෙනවා. එමගින් සොරකම් කරනලද , තහනම් කරනලද දුරකතන ජාලයට පිවිසෙන එක වලක්වන්න පුළුවන්. එනම් තමාට අයත් දුරකතනයක් සොරකම් කර ඇත්නම් හැකි විගස දුරකතන සේවා සැපයුම් කරුට දන්වලා ඒ දුරකතනය Blacklist කරන්න පුළුවන්.

IMEI අංකය යොදාගන්නේ එක් නිශ්චිත උපාංගයක් හඳුනාගන්න පමණයි. එය භාවිතා කරන ග්‍රාහකයා හඳුනාගැනීමට භාවිත කරන්නේ නැත. ග්‍රාහකයා හඳුනා ගන්නේ SIM කාඩ් පත තුල ඇති IMSI (International mobile subscriber identity) අංකය මගිනි. එසේම බොහෝ ජාල වල ආරක්ෂක උපක්‍රමයක් ලෙස ග්‍රාහකයා භාවිතා කරන උපාංඟ හඳුනා ගැනීමට මේ IMSI අංකය සමග IMEI අංකය භාවිතා කරනවා.

➥චෙක් කරගන්න පුළුවන්ද?

https://www.imei.info වෙබ් සයිට් එකට ගිහින් ඕනි කෙනෙක්ට තමන්ගෙ ෆෝන් එකේ IMEI එක හරි එකක්ද වැරදි එකක්ද කියලා පරික්ෂා කරගන්න පුළුවන්. අටෝරසියක් නම් වලින් ෆෝන් දැන් එන හින්දා ව්‍යාජ විදිහට හදපු ෆෝන් හදුනා ගන්න මේ සයිට් එකෙන් පුළුවන්. ෆෝන් එකේ වර්ගය, මාදිලිය විතරක් නෙවෙයි ෆර්ම්වෙයා එක ඩවුන්ලෝඩ් කරන්නත් මේ වෙබ් සයිට් එක උදව් කරනවා.

Read More

August 15, 2018

අළුත්ම කැමරා 4ක Huawei nova 3/3i ගැන

ජංගම දුරකතන නිපදවන සමාගම් අතරින් අතිශය ජනප්‍රිය නමක් තමයි Huawei කියන්නේ. ඔවුන් විසින් එළිදක්වන ලද අලුත්ම දුරකතනය වන Huawei nova 3 හා nova 3i ගැනයි මේ ලිපිය.

Huawei nova මාදිලිය තරුණ පරම්පරාවට ගැලපෙන ලෙස ඉලක්ක කර නිපදවූ Mid-Range දුරකතනයක්. nova යනු ලතින් භාෂාවෙන් අලුත් යන තේරුම ගෙන එයි. එනම් මීට පෙර එළිදක්වන ලද nova 2 මාදිලියට වඩා අලුත් විශේෂාංග nova 3 හිදී දැක ගැනීමට පුළුවන්.

➥බඳ හා නිමාව
දුරකතනයේ බඳ සිත් ඇදගන්නා සුළු හා සීරීම් වලට ඔරොත්තු දෙන ආකාරයෙන් ඉදිරිපස හා පසුපස වීදුරු වලින් නිර්මාණය කර තිබෙන අතර දුරකතනය ශක්තිමත් ඇලුමිනියම් රාමුවකින් යුක්ත වෙනවා.nova 3 දුරකතනයේ බර 166g පමණ හා විශාලත්වය 157 x 73.7 x 7.3 mm (6.18 x 2.90 x 0.29 in) වේ. nova 3i දුරකතනයේ බර 169g පමණ හා විශාලත්වය 157.6 x 75.2 x 7.6 mm (6.20 x 2.96 x 0.30 in) වේ. දුරකතන දෙකෙහි පවතින ප්‍රධාන වෙනස්කමක් වන්නේ මෙයයි. nova 3 Black, Blue, iris purple යන වර්ණ 3 කින් පැමිණෙන අතර iris purple ඔවුන් හදුන්වාදුන් නවතම වර්ණයයි.

➥තිරය
Huawei nova 3 හි අඟල් 6.3 ක IPS LCD capacitive touchscreen, 16M colors තිරයක් තිබෙන අතර තිරය දුරකතනයේ 84.2% දක්වා ඇත. එමනිසා ඉදිරිපස කැමරාව හා අනෙකුත් සංවේදක යුතු කුඩා කොටසක් පමණක් (notch) ඉතිරිකොට තිබේ. තිරයේ විභේදනය 1080 x 2340 pixels, 19.5:9 ratio (~409 ppi density) වන අතර එය Huawei EMUI 8.2 මගින් බලගන්වා ඇත.

➥කෘතිම බුද්ධියෙන් බලගැන්වූ කැමරා 4

24 mega-pixel (mono) + 16 mega-pixel (colour), පසු පස කැමරාවත් , 24 mega-pixel (colour) + 2 mega-pixel (colour) ඉදිරිපස කැමරාවකුත් nova 3 හි පවතිනවා. ඉහතින් දැක්වුවා සේම මෙම කැමරා 4 ම කෘතිම බුද්ධියෙන් බලගන්වා තිබෙනවා. එමගින් පසු පස කැමරාවෙන් එකිනෙකට වෙනස් වූ වස්තූන් 22ක් හා ඉදිරිපස selfie කැමරාවෙන් වස්තූන් 8 ක් වෙන්වෙන්ව හඳුනාගනන්න මෙහි ක්‍රියාත්මක වන AI වැඩසටහනට පුළුවන්.

එලෙසම අලුතෙන් නිකුත්වන ස්මාර්ට් දුරකතනවල ඇති මුහුණේ ඉරියව් වලට වෙනස්වන 3D ඉමෝජි පහසුකම Qmoji ලෙස අලුත් nova 3 හි පවතිනවා.

MAIN CAMERA	Single	16 MP, f/1.9, 28mm, 1/2.6", 1.12µm, OIS, AF
	Features	LED flash, auto-HDR, panorama
	Video	2160p@30fps, 1080p@60fps, 720p@120fps, HDR, dual-video rec.

SELFIE CAMERA	Single	5 MP, f/1.9, 22mm, 1/4.1", 1.34µm
	Features	Dual video call, Auto-HDR
	Video	1440p@30fps

➥මෙහෙයුම් පද්ධතිය හා චිප් පද්ධතිය

nova 3 ඇන්ඩ්‍රොයිඩ් 8.1 ඔරියෝ මගින් ක්‍රියාත්මක වෙනවා. මෙහි ක්‍රියාත්මක වෙන චිප් පද්ධතිය වන්නේ HiSilicon Kirin 970 යි. nova 3i HiSilicon Kirin 710 මගින් ක්‍රියාත්මක වේ. මෙම චිප් පද්ධතිය AI තාක්ෂණය සහය දක්වන අතර Gaming සඳහා විශේෂ අවධානයක් යොමු කර ඇත. එම නිසා ඊටම ගැලපෙන Mali-G72 MP12 GPU එක යොදා තිබේ. එමනිසා ක්‍රිඩා වලදී අතරමැද සිරවීමකින් තොරව වේගවත්ව ක්‍රීඩා කල හැක.

PLATFORM	OS	Android 8.1 (Oreo)
	Chipset	Hisilicon Kirin 970
	CPU	Octa-core (4x2.4 GHz Cortex-A73 & 4x1.8 GHz Cortex-A53)
	GPU	Mali-G72 MP12

➥මතකය

Huwaei සමාගම සිය key-point එක ලෙස nova 3 හි යොදාගෙන ඇත්තේ එහි මතකයයි.ගොඩක් දෙනෙකුට තියෙන ගැටලුව වන්නේද මතකයයි. ෆෝන් එකෙන් ලබා ගන්නා වීඩියෝ හා ෆොටෝ වල ගුණාත්මක බව වැඩි වෙන්න, වැඩි වෙන්න .nova 3 හි 6GB RAM මතකයක් සමග 128GB storage මතකයක් ලැබෙනවා. nova 3i ඇති වෙනස එහි RAM මතකය 4GB වීමයි. ඒවගේම අමතරව 256GB දක්වා මෙමරි කාඩ් භාවිතා කිරීමේ හැකියාව තිබෙනවා.

➥අනෙක් විශේෂාංඟ

nova 3 වල ෆාස්ට් චාර්ජින් සපෝට් කරන 3750mAh බැටරියක් තියෙනවා. ඒ වගේම Dual SIM (hybrid), VoLTE හා USB connector එක USB type C 2.0 පෝට් එකක් . අනෙක් අළුත් ෆෝන් වල වගේම finger print sensor එකක් තියෙනවා. ෆේස් අන්ලොක් තාක්ෂණය nova 3 ෆෝන් එකේදි දියුණු කරලා IR face unlock තාක්ෂණය තියෙන නිසා අඳුරු අවස්ථා වලදී වුණත් ගැටලුවක් නැතුව ෆෝන් එකේ ලොක් අන්ලොක් අරන්න පුළුවන්.

Read More

August 9, 2018

අඩු වියදම් Wireless Security කැමරාව!

නිවසේ ,වැඩකරන තැන ආරක්ෂාවට CCTV කැමරා සවි කරන එක දැන් ගොඩක් අය කරන දෙයක්. සාමාන්‍යයෙන් කැමරා 6 ක් එක්ක CCTV කැමරා පද්ධතියක් සවි කරන්න රු.40000 ක් විතර යනවා. කැමරා 1ක් 2ක් ඕනි අයට මේවගෙ ගානක් වියදම් කරන එක වැඩක් නෑ. ඒ වෙනුවට වැඩි වැඩ තියෙන ලේසියෙන් සවි කරගන්න පුළුවන් කැමරාවක් ගැනයි මේ ලිපිය.

➥කැමරාව ගැන

JOOAN කියන වර්ගයේ C5M D කියන මොඩල් එකේ කැමරාව තමයි මේ වැඩේදි ගත්තෙ. ප්‍රමාණයෙන් අනිත් CCTV කැමරාවක් තරම්ම වෙනවා. කැමරාව ගන්නකොට ඒකත් එක්ක AC Power Adepter එකක්, මීටර් කීපයක් දිග Micro USB කේබල් එකක් බිත්තියක, වහලයක සවි කරන්න ගන්න Bracket එකක් එහෙමත් ලැබෙනවා. මේකෙ මිල රු.3000 ත් 4000 අතර වෙනවා.

➥විශේෂත්වය

ප්‍රධානම විශේෂත්වය තමයි රැහැන් රහිත වීම. තව මේකට 128GB දක්වා SD Card යොදා ගන්න පුළුවන් කම තියෙනවා. ඒවෙන හැම දේම record කරගන්න පුළුවන්. ඒ වගේම අනිත් කැමරා වලට වඩා වෙනස් පහසුකමක් මේකෙ තියෙනවා. ඒ තමයි මේ කැමරාව හරහා වෙන දේවල් ෆෝන් එක හරහා අහන්න පුළුවන්. ඒ වගේම ෆෝන් එකෙන් කැමරාවෙන් කතා කරන්නත් පුළුවන්. අනිත් විශේෂත්වය තමයි කැමරාව 350⁰දක්වා හරවා බලන්න පුළුවන්. මේ කැමරාව අනිත් CCTV කැමරා වල තියෙන Night Vision පහසුකම, Motion detection පහසුකමත් තියෙන 720p HD කැමරාවක්.

කැමරාව ගොඩක් User Frendly. එහෙම කියන්න හේතුව තමයි කැමරාවෙ වෙන දේවල් කියන්න මේ කැමරාවට පුළුවන් (කැමරාව Configure කරන වෙලාවෙදි). කැමරාවෙ මිලට සාපේක්ෂව ආලෝකය තියෙන අවස්ථාවල, නැති අවස්ථාවල ලැබෙන රූපරාමු වල ගුණාත්මක බව නම් ගොඩක් හොඳයි.

1. Lens: 3.6mm, 1MP ,1280x720p

2. Pan Horizontal 350 & &Tilt Vertical:100

3. IR distance: 20ft

4. Power DC: 5V / 2A – Power

5. Power consumption: < 7W

➥ඇප් එක

කැමරාවෙන් වැඩ ගන්න ස්මාර්ට් ෆෝන් එකෙ Danale ඇප් එක ඉන්ස්ටෝල් කරගන්න ඕනි. Android හා iOS වලට මේ ඇප් එක සහය දක්වනවා. ඇප් එක ඉන්ස්ටෝල් කරලා මුලින්ම Account එකක් නැත්නම් ඇප් එකෙන්ම රෙජිස්ටර් වෙලා Account එක හදාගන්න ඕනි. එකවර කැමරා 4ක දර්ශන නරඹන්න Danale ඇප් එකෙන් පුළුවන්.

කැමරාවේ වීඩියෝ දර්ශන ක්ලවුඩ් වල රඳවන්න පුළුවන්. හැබැයි ඒකට මුදල් ගෙවන්න ඕනි.

ඉතිං වැඩිය දඟලන්නෙ නැතුව පහසුවෙන් ඉක්මනින් අඩු වියදමින් සවිකර ගන්න පුලුවන් කැමරාවක් හොයනවනම් මේක තමයි ඒකට හොඳම කැමරාව. ගන්න කෙනෙක් ඉන්නවනම් මෙන්න මේ ලින්ක් එකෙන් ගිහින් ගන්න පුළුවන්.

Read More

July 13, 2018

ෆේස්බුක් මැසෙන්ජර් හරහා ආ මැල්වෙයා වයිරසය

දැන් ටික දිනක පටන් ෆේස්බුක් මැසෙන්ජර් හරහා “This video is yours?” යනුවෙන් ලිංක් එකක් හුවමාරු වුණා. මුලින්ම මේ ගැන වාර්ථා වුණේ සිංගප්පූරුවෙන්. තමංගේම යහළුවෙකු මාර්ගයෙන් ෆේස්බුක් මැසෙන්ජර් හරහා මේ පණිවිඩය පැමිණිම නිසා ගොඩක් අය මේ වයිරසයට ගොදුරු වුණා.

මේ විදිහට ආපු පණිවිඩයේන් ඇත්තටම සිදුවුණේ වීඩියෝවක් පෙන්වීම නම් නෙවෙයි. ඒ වෙනුවට සිදුවුණේ ෆේස්බුක් ලොගින් විස්තර ලබාගැනීමට හැකි මැල්වෙයා වැඩසටහනක් හොර රහසේම පරිගණකයේ ඉන්ස්ටෝල් කිරීමයි. ඇතැම් වෙලාවට වීඩියෝ එක පෙන්වනවා වෙනුවට ෆේස්බුක් ලොගින් පේජයට සමාන වෙබ් පිටුවක් විවෘත වුණා. ඒ ඇත්ත වෙබ් පිටුව වෙනුවට සැකසූ ව්‍යාජ (ෆිෂින්) වෙබ් පිටුවක්. එහෙදී වීඩියෝව බැලීමට නම් ෆේස්බුක් ලොගින් විස්තර ඇතුලත් කරන ලෙස පැවසුවා.එයට ඇතුලත් කරන තොරතුරු සියල්ල මේ පණිවිඩය එවූ හැකර් කරු සතුවනවා.

සැබෑ වෙබ් පිටුව ලෙසම සැකසූ ව්‍යාජ වෙබ් පිටුවක් (Address bar එක බලන්න )

දැනටමත් මැසෙන්ජර් හරහා එවන පණිවිඩ එවනු ලබන්නේ මෙලෙස හැකර් කරුවන් අතට පත්වූ ෆේස්බුක් ගිණුම් වලිනි. ඒ වගේම තවත් ආකාරයක වංචනික වෙබ් පිටුවකදී ලිංක් එක ක්ලික් කල කෙනාට වීඩියෝව බලන්න අවශ්‍ය නම් ඒ වෙබ් පිටුවේ තියෙන කේතයක් බ්‍රව්සරයේ ඇඩ්‍රස් බාර් එකට කොපි කරන ලෙස පැවසුවා. එසේ කල විට සිදුවන්නේ අයිතිකරුගේ ෆේස්බුක් ගිණුම සියතට ගතහැකි JavaScript එකක් හැකර් කරු විසින් ක්‍රියාත්මක කිරීමයි.

▶️ෆේස්බුක් ගිණුම් මොකටද?

මේ විදිහට ලබාගන්නා ගිණුම් වලින් හැකර් කරුවන් තවදුරටත් වෛරසය පැතිරවීම වගේම ගිණුම් හිමියා සිදු කරන ක්ලික් කිරීම් , සෙවීම් ආදිය ඉලක්ක කර කරදරකාරී දැන්වීම් එවීම සිදුකරනු ලබනවා. ඒවායින් ඔවුන් මුදල් උපයනු ලබනවා.

▶️ආරක්ෂා වෙන්නේ කොහොමද?

ෆේස්බුක් ගිණුමට අනවසර ඇතුල් වීම් වලක්වන ක්‍රමයක් ෆේස්බුක් ගිණුමේම තියෙනවා. ඒ තමයි two-factor authentication නැතිනම් ආකාර දෙකකින් අනන්‍යතාව තහවුරු කිරීමේ ක්‍රමය යොදා ගැනීම. ෆේස්බුක් පිටුවේ දකුණුපස ඉහල, පහලට ඇති (▼) ආකාරයේ අයිකනය ක්ලික් කර Settings > Security and Login ක්ලික් කර එයින් two-factor authentication තෝරා ගෙන තමන්ට පහසු ක්‍රම දෙකක් තෝරා ගෙන ඉදිරියට යා යුතුයි.

ඒ වගෙම මෙවැනි අනර්ථකාරී වෙබ් අඩවි වලින් වැලකෙන්න කරන්න පුළුවන් සරල උපක්‍රම කීපයක් තියෙනවා.

තමන් නොදන්නා වෙබ් අඩවි වලදි කිසිම විටක කිසිම ගිණුමක තොරතුරු ඇතුලත් නොකිරීම.
සෑම විටම හරිම වෙබ් අඩවියේ සිටින්නේ දැයි විමසිලිමත් වීම.
ශක්තිමත් මුර පදයක් භාවිතා කිරීම.
ගිණුමේ තොරතුරු කිසිඳු හේතුවක් මත අන්අය අතට පත් නොකිරීම.
පොදු ස්ථානයකදී (Internet Cafe) හෝ වෙන කෙනකුගේ පරිගණකයකදී ගිණුම් විවෘත කිරීමට වෙබ් බ්‍රව්සරයේ Incognito Mode ආකාරය යොදා ගැනීම.
යාවත්කාලින කරන සුදුසු Anti Virus මෘදුකාංගයක් ක්‍රියාත්මකව තැබීම.

මේ විදිහට වැඩ කරනවා නම් බොහෝදුරට මෙවැනි කරදර වලින් බේරීලා ඉන්න පුළුවන්.

Read More

July 6, 2018

සම්පත් බැංකුවේ Slip-less ඇප් එකෙන් වැඩ ගන්නෙ මෙහෙමයි

එදිනෙදා සිදුවෙන ගණුදෙනු පහසු කරන්න බැංකු මගින් නොයෙක් තාක්ෂණික සේවා පහසුකම් ලබා දෙනවා. ඒ අතරින් මෑතකදී සම්පත් බැංකුව හදුන්වා දුන්න සේවයක් තමයි Sampath Slip-less ඇප් එක. පුරුදු විදිහට බැංකුවට ගිහින් Cash deposit slip එකක් පුරවනවා වෙනුවට මේ ඇප් එකට තොරතුරු ඇතුලත් කරලා බැංකුවට දෙන්න පුළුවන් කරන්න පුළුවන්.

ඇප් එක Download කරගන්න

ඇන්ඩ්‍රොයිඩ් ෆෝන් වලට Google Play වලින් වගේම ඇපල් ෆෝන් වලට App Store වලින් Slip-less ඇප් එක ඩවුන්ලෝඩ් කරගන්න පුළුවන්.

වැඩ කරන්නෙ මෙහෙමයි

ඇප් එක install කරගත්තට පස්සෙ මුලින්ම එන්නෙ මේ screen එක. ඒකෙදි නම, ජාතික හැදුනුම් පත් අංකය, ෆෝන් නම්බර් එක වගේම ලිපිනයත් දෙන්න ඕනි. ඊට අමතරව දැනටමත් සම්පත් බැංකුවේ ගිණුමක් තියෙනවද නැද්ද කියන එකත් ඇප් එකෙන් අහනවා. ගිණුමක් නැති කෙනෙක් නම් මුදල් තැන්පත් කරන්න විතරක් පහසුකම් ලැබෙනවා.

ඊට පස්සේ දීපු ෆෝන් නම්බර් එක තහවුරු කරගන්න අංක හතරක කෝඩ් එකක් එවනවා. අන්න ඒක ඊළඟට එන screen එකේ ටයිප් කරන්න ඕනි.

අලුත් ස්ලිප් එකක් පුරවන හැටි

ඊළඟට එන Slip screen එකේ pending කියන ටැබ් එකෙ පහල තියෙන + ලකුණ ටච් කලාම අලුත් ස්ලිප් එකක් ලැබෙනවා.

දැන් ඉතින් සාමාන්‍ය slip එකක වගේම උඩින් ගිණුම් අංකය නෝට්ටු ප්‍රමාණය වගේම මුදල රු.200,000 වැඩි නම් අවශ්‍යතාවය සඳහන් කරන්න ඕනි.

මේ ඔක්කොම විස්තර ටික ඇතුලත් කරලා පහලින් තියෙන Create Transaction කියන බට්න් එක ටච් කරාම Cash Deposit Slip එක හැදෙනවා.

දැන් කරන්න තියෙන්නෙ මේ හදපු ස්ලිප් එක සල්ලිත් එක්ක බැංකුවට ගිහින් දෙන එකයි. Pending list එකේ තියෙන slip එක open වුණාම මේ විදිහට Reference number එකක්, QR Code එකක්, Bar Code එකක් එක්ක ගණුදෙනුවෙ සාරාංශයක් බලා ගන්න පුළුවන්. බැංකුවට මේ Reference Number එක තමයි ඕනි වෙන්නෙ.

ඒවගේම ඒ ගණුදෙනුව ගැන විස්තරයක් ඊ-මේල් එකටත් එනවා. ඕනි නම් රිසිට් එකක් වෙනම ගන්නත් පුළුවන්.

බැංකුවෙන් ලැබුණ රිසිට් එක

ඊ-මේල් එකට ආපු විස්තරය

ගණුදෙනුව සම්පූර්ණ වුණාම ඒක Completed ටැබ් එකේ පෙන්නනවා.

ස්මාර්ට් ෆෝන් වලට අලුත් අයට නම් මේක ටිකක් කරදරකාරී වැඩක් වෙන්න පුලුවන්. කොහොම වුණත් නිතර ගණුදෙනු කරන අයට නම් මේ ඇප් එක වටිනවා. ඒ වගේම මේ ඇප් එකේ වැඩ කරන්න නම් internet තියෙන්න ඕනි. එහෙම නැති වෙලාවක නම් payment එකට අදාල reference number එක මතක නැත්නම් බැංකුවට ගිහින් පුරුදු කඩදාසි කොලය පුරවන්න වෙනවා!

Read More

Raspberry Pi පාඩම : Tiny RTC මොඩියුල සවි කරමු

අලුත් වුණු ක්‍රෝම් වෙබ් බ්‍රවුසරය

ෆෝන් එකේ IMEI අංකය ගැන

අළුත්ම කැමරා 4ක Huawei nova 3/3i ගැන

අඩු වියදම් Wireless Security කැමරාව!

ෆේස්බුක් මැසෙන්ජර් හරහා ආ මැල්වෙයා වයිරසය

සම්පත් බැංකුවේ Slip-less ඇප් එකෙන් වැඩ ගන්නෙ මෙහෙමයි

එකතුවෙන්න...

tech එකේ ඉන්න අය

Contact Form

ජනප්‍රිය ලිපි

ලිපි එකතුව

ආව ගිය අය

ලිපි කියවා ඇති ගණන