February 25, 2015

මාර්තු 23 දායින් පසු බ්ලොගර් තුල අසැබි දසුන් බෑ...

             මාර්තු 23 එනම් ලබන මස 23 වන දා සිට ගූගල් සමාගමේ බ්ලොග් සේවාව වන බ්ලොගර් තුල අසැබි අන්තර්ගතයක් සහිත බ්ලොග් අඩවි සඳහා සේවා ලබා නොදීමට ගූගල් සමාගම තීරණය කර තිබේ. මේ හේතුවෙන් මාර්තු 23 වනදායින් පසු වැඩිහිටියන්ට පමණක් වෙන්වූ අසැබි පින්තූර, වීඩියෝ වෙනත් එවැනි දේ සහිත බ්ලොග් අඩවි බ්ලොගර් තුලින් දර්ශණය නොවනු ඇත. මෙහිදී දැනට එසේ තිබෙන කිසිඳු බ්ලොග් අඩවියක් ඉවත්ව නොයන අතර එහි අයිතිකරුවාට පමණක් එය නැරඹිය හැකිය. දැනට මෙසේ පවතින බ්ලොග් අඩවි තමාට පමණක් නැරඹිය හැකි අයුරින් සැකසුම් සකස්කර ගන්නා ලෙස ගූගල් සමාගම දන්වා සිටී. එසේම මාර්තු 23 දාට පෙර අරඹන සෑම බ්ලොගයක් ම සඳහා අසැබි අන්තර්ගතයකින් තොරව නිර්මාණය කරන ලෙස වැඩිදුරටත් දන්වා සිටී.

February 23, 2015

VB වලින් වෙලාවට ඕෆ් වෙන,රීස්ටාර්ට් වෙන ප්‍රෝග්‍රෑම් එකක්..

විෂුවල් බේසික් වලින් කරන්න පුලුවන් සරල ඒත් ගොඩක් වැඩ ගන්න පුලුවන් ප්‍රෝග්‍රෑම් එකක් හදන හැටි තමයි මේ පෝස්ට් එකෙන් කියල දෙන්නෙ. මේ ප්‍රෝග්‍රෑම් එකෙන් අපේ කොම්පියුටරය යම් වෙලාවකට අනුව ෂට් ඩවුන් කරන්න, රීස්ටාර්ට් කරන්න, ලොග් ඕෆ් කරන්න පුලුවන්. මේකෙ සෝස් කෝඩ් එක පහලින් ඩවුන්ලෝඩ් කරගන්න තියෙනවා. ලියල තියෙන්නෙ VB 6.0 වලින්. ගැටලු තියෙනවනම් කමෙන්ට් එකක් දාන්න.

February 22, 2015

Ro-bow වගේ වයලින් වාදනය කරන්න පුලුවන්ද?

වයලින් එකක් ගහන්න හොඳ පුහුණුවක් තියෙන්න ඕනි. ඒත් දැන් ඒකටත් විසඳුමක් තියෙනවා. මේ තියෙන්නෙ වයලීන් වාදනය කරන්න පුලුවන් රොබෝ කෙනෙක්.මේ රොබෝගෙ නම තමයි  Ro-bow. නම වගේම තමයි වැඩත්. ලබා දෙන ඕනෑම ස්වර ප්‍රස්ථාරයක් වරද්දන්නෙ නැතුව නිවැරදිව වයන්න මේ රොබෝට පුලුවන්. මේක හදල තියෙන්නෙ සෙත් ගෝල්ඩ්ස්ටයින් කියල කෙනෙක්. මේ රොබෝ වැඩ කරන්නෙ විද්‍යුත් චුම්බක ඇඟිලි , ස්ටෙප් මෝටර් ආදියයොදා ගෙන. උපදෙස් දෙන්න යොදා ගන්නෙ පරිගණකය. පරිගණකයේ තියෙන ඩිජිටල් මියුසික් ෆයිල් ඇත්ත වයලීන් එකකින් වයන්න මේ රොබෝට පුලුවන්. සරල නිර්මාණයක් වගේ පෙනුනත් මේක ඉතා සංකිර්ණ නිර්මාණයක්. දෘඩාංඟ නිවැරදිව සවිකිරීම පටන් ඊට අදාල මෘදුකාංඟ සැකසීම පවා ඉතා සංකීර්ණ ක්‍රියාවකි. මේ තියෙන්නෙ ඒ උත්සහයේ ප්‍රතිඵලය. පහල තියෙන වීඩියෝ එක බලල කියන්නකො කොහොමද කියලා.
අපේ රටෙත් මේ වගේ දක්ෂයො ඇති. එහෙම අය ගැන ලෝකෙටම කියන්න tech සයුර සූදානම්....

February 19, 2015

ඩ්‍රයිවර්ස් ලේසියෙන්ම හොයා ගන්න, බැකප් කරගන්න විදිහ..

කොම්පියුටරය ෆෝමැට් කරපු ගමන් ගොඩක් අයට එන ගැටලුවක් තමයි ඩ්‍රයිවර්ස් හොයාගන්න එක. වින්ඩෝස් එක්ස්පී වල නම් ඩ්‍රයිවර්ස් නැතුව සවුන්ඩ් වත් වැඩ කරන්නෙ නෑ. අලුත් ඕඑස් වල නම් ඒ ගැටලුව නෑ. ඒත් නෙට්වක් ග්‍රැ‍ෆික් වගේ ඩ්‍රයිවර්ස් නැතුව වැඩ කරන්න ටිකක් අමාරුයි. මේ තියෙන්නෙ ඒකට විසඳුම්..
ඩ්‍රයිවර්ස් බැකප් කර ගන්න ඩබල් ඩ්‍රයිවර්
වයිර්ස් එකක් ගිහින් එහෙමත් නැත්නන් වෙන මොකක් හරි ගැටලුවකදී මේ වැඩේ කරන්න පුලුවන්. ඒ තමයි ඩ්‍රයිවර්ස් බැක්ප් කරල තියා ගන්න එක. ඒකට නොමිලේ දෙන හොඳ සොෆ්ට්වෙයා එකක් තියෙනවා.  මේ සොෆ්ට්වෙයා එක ඩබල් ඩර්යිවර් (Double Driver). ඉන්ස්ටෝල් කරන්න දෙයක් නෑ.මේකෙන් වැඩ කරන්නෙ මෙහෙමයි.
*මේ තියෙන්නෙ ඩබල් ඩ්‍රයිවර් එකේ වින්ඩෝ එක
*මෙ වින්ඩෝ එකේ උඩින් තියෙන Backup කියන එක ක්ලික් කරන්න.
*දැන් Scan Current System කියන එක ක්ලික් කරන්න. දැන් ඉන්ස්ටෝල් කරල තියෙන ඩ්‍රයිවර්ස් පෙන්නාවි.
*ඊළඟට පහලින් තියෙන Backup Now බට්න් එක ක්ලික් කරන්න.දැන් සේව් කරන්න කැමති තැනක් දීලා බැකප් කරගන්න. කොම්පියුටරේ ෆොර්මැට් කරනවනම් ඩ්‍රයිවර්ස් ටික පෙන් එකකට බැකප් කරන එක තමයි හොඳ.
රී ස්ටෝ කරන විදිහ
*සොෆ්ට්වෙයා එක ඕපන් කරලා Restore කියන එක ක්ලික් කරන්න. 
*ඊට පස්සෙ බැකප් කරපු තැනින් ෆෝල්ඩර් එක ‍තෝරන්න. දැන් ඩ්‍රයිවර්ස් ටික රීස්ටෝ කරන පුලුවන්.
ඩ්‍රයිවර්ස් හොයා ගන්න ත්‍රීඩීපී චිප්
                    මේ සොෆ්ට්වෙයා එකෙන් ලේසියෙන්ම ඩ්‍රයිවර්ස් හොයල ඉන්ස්ටොල් කරන්න පුලුවන් පෝටබල් සොෆ්ට්වෙයා එකක්. කොම්පියුටරයෙ දැනට තියෙන ඩ්‍රයිවර්ස් වගේම ඉන්ස්ටොල් කරල නැති  ඩ්‍රයිවර්ස්  හොයා ගෙන ඩවුන්ලෝඩ් කරන්න මේ සොෆ්ට්වෙයා එකෙන් පුලුවන්.

February 15, 2015

SIM එකක් වැඩ කරන්නෙ කොහොමද?

SIM එක කියන්නෙ මොකද්ද කියල අද ඉන්න පොඩි ළමයෙක් වුණත් දන්නවා. අලුතෙන් මොබයිල් ෆෝන් එකක් ගත්ත ගමන් ඊළඟට හොයන්නෙ අඩුවෙන් කැපෙන වැඩියෙන් කතා කරන්න පුලුවන් SIM එකක්... ඒත් මේ පුංචි ප්ලාස්ටික් කෑල්ල වැඩකරන හැටි දන්නවද?
ලෝකයේ භාවිත කරන ජංගම දුරකථන ප්‍රධාන වශයෙන් කොටස් දෙකකට බෙදේ. ඒ GSM (Global System for Mobile) හා CDMA (Code Division Multiple Access) වශයෙනි. මෙයින් GSM ගණයේ ජංගම දුරකථන සිම් කාඩ් භාවිත කරන අතර CDMA දුරකථන වල එය භාවිත නොකරයි. GSM දුරකථන වලට SIM එකක් නොමැතිව      සන්නිවේදන ජාල හා සම්බන්ඳ විය නොහැක. නමුත් CDMA දුරකථන එසේ නොවේ. එය ජාලය තුල හඳුනා ගැනීමට ESN (Electronic Serial Number) නම් විශේෂ අංකයක් භාවිතා කෙරේ.නමුත් ලෝකයේ වැඩියෙන්ම භාවිතා කරනුයේ GSM දුරකථන වේ.
SIM (Subscriber Identity Module) එකක් යනු සරල පරිගණකයකි (මයික්‍රොකොන්ට්‍රෝලරයක් වැනි). එයට ඊට ආවෙනික වූ මෙහෙයුම් පද්ධතියක් ඇත. එයට දී ඇති උපදෙස් ගොණු හෙවත්

 මෘදුකාංඟ වලින් එය ක්‍රියාත්මක වේ. කුඩා මතකයක් හා ආරක්ෂක යාන්ත්‍රණයක් ඇත.මේ සිම් කාඩ් පතෙහි ඇති තොරතුරු වෙනස් කරන්නට ඊට සේවා සපයන සංන්නිවේදන ආයතන් වලට හැකියාව පවතී. ඊට ඔවුන් භාවිතා කරන්නේ අපූරු ක්‍රමයකි. එනම් විශේෂ කෙටි පණිවිඩයක් ආධාරයෙන් මේ තොරතුරු අවශ්‍ය පරිදි වෙනස් කරයි. එය OTA නැත්නම් Over the Air programming ලෙස හඳුන්වයි. මේ එවන කෙටි පණිවිඩ ඒ දුරකථනය භාවිත කරන්නාට නොදැනේ. 
සිම් එකක් තුල ඉතා වැදගත් තොරතුරු තිබේ. IMSI (International Mobile Subscriber Identity) නම් විශේෂිත කේතයක් සිම් පත් තුල පවතී.ජාලය තුල භාවිත කරන්නා හඳුනා ගන්නේ එම කේතය උපකාරයෙනි. එම කේතය සපයන්නේ දුරකථන සේවා සපයන ආයතනය විසිනි. දුරක්ථනයක් ක්‍රියාත්මක වූ පසු එය ජාලය වෙත ප්‍රවේශ වන්නේ මෙසේය,
  1. දුරකථනය ක්‍රියාත්මක වූ වහාම එය SIM එකෙහි ඇති IMSI කේතය ජාලය තුලට ලබා   දී එය වෙත ප්‍රවේශ වීමට අවසර ඉල්ලයි (request for access)
  2. දෙවනුව ජාලය විසින් එම කේතය දත්ත ගබඩාවේ ඇති වලංඟු කේතයක් දැයි සොයා බලයි.
  3. ජාලය විසින් අහඹු අංකයක් (random number) (A) ජනනය කරනු ලබයි. ඉන් පසු එය IMSI කේතය සමග එක් කර නව අංකයක් නිර්මාණය කරනු ලබයි (B). සිම් කාඩ් පත නිත්‍යානුකූල එකක් ද යන්න නිවැරදිවම දැන ගැනීමට මෙම අංකය (B) භාවිතා කරයි.
  4. දැන් දුරකථනය විසින් ජාලය ජනනය කල අහඹු අංකය (A) ලබා ගෙන, එය සිම් එකෙහි IMSI අංකය සමග එක්කර නව අංකයක් (C) නිර්මාණය කරයි. මෙම අංකය නැවත ජාලය වෙත එවනු ලබයි.
  5. අවසාන වශයෙන් ජාලය විසින් ජනනය කරන ලද (B) අංකය හා දුරකථනයෙන් එවන ලද (C) අංකය එකිනෙක හා ගැලපෙන්නේ දැයි පරික්ෂා කොට එය ගැලපේ නම් ජාලය තුලට ප්‍රවේශ වීමට අවසර ලබා දෙයි.
සෑම සිම් කාඩ් එකක් තුලම ඊට අනන්‍ය අංකයක් පවතී. ICCID (Integrated Circuit Card Identifier) යනු එම අංකයයි. එය සිම් පත තුල හා සිම් පත මතුපිට මුද්‍රණය කර ඇත. ICCID අංකය කොටස් 3කින් යුක්ත වේ. සිම් පත නිකුත් කරන්නාගේ අංකයක්,  අනෙක් ගිණුම් වලින් වෙන්ව හඳුනා ගැනීමේ අංකයක් හා අමතර ආරක්ෂාව වෙනුවෙන් යොදා ගැනෙන සාම්‍ය අංකය ඒ කොටස් 3 වේ.
සිම් කාඩ් පතක් දත්ත ‍රැඳවීමට කුඩා මතකයකින් ද යුක්ත වේ. සාමාන්‍යයෙන් මෙය කිලෝබයිට් 32 සිට 128 දක්වා වූ පරාසයක පවතී. ඒ තුල කෙටි පණිවිඩ (SMS) හා දුරකථන අංක (contact list) ගබඩා කොට තැබිය හැක. මෙම අගය බොහෝ විට සිම් පත මත සටහන් කොට තිබේ. නමුත් බොහෝ විට මෙම තොරතුරු රඳවා තිබෙන්නේ දුරකථනයේ මතකය තුලයි. ඊට හේතුව හදිස්සියකදී  සිම් පත නැති වුවහොත් සිදුවන අවධානමෙන් මිදීමටය. කෙසේ වෙත්තත් දුරකථනයේ මතකය හා සැසඳීමේදී සිම් මතකය ඉතා කුඩා අගයකි.
විවිධ ජංගම දුරකථන වල විවිධ ප්‍රමාණයේ සිම් භාවිත කරයි. ඇත්තෙන්ම මෙහි වෙනස් වන්නේ සිම් පතේ ප්‍රමාණය මිස එහි ඇති පරිතයේ ප්‍රමාණය නොවේ. අද තිබෙන බොහෝ ස්මාර්ට් ෆෝන් වල භාවිත වන්නේ මයික්‍රෝ (Micro SIM) සිම් කාඩ් ය.
         මුලින්ම SIM එක නිපදවූයේ Giesecke&Devrient විසින් 1991 වර්ෂයේදී ය.එදා සිට අද දක්වා මෙහි දෝෂ සමනය කරන්නේත් එහි වගකීම දරන්නේත් GSMA ආයතනය විසිනි.

February 13, 2015

නිවාස ආරක්ෂාවේ අනාගත අධි-තාක්ෂණය

අද අප ජීවත් වන ලෝකයේ තිබෙන්නා වූ තාක්ෂණය ඉතා දියුණු මට්ටමක ඇති එකකි. එය දිනෙන් දින දියුණු වෙමින් පවතී. නූතන තාක්ෂණික මෙවලම් භාවිත වන ක්ෂේත්‍ර අතරින් ඉදිකිරීම් හා ආරක්ෂක ක්ෂේත්‍රය මුල් තැනක් ගනී. මේ ලිපියෙන් කියැවෙන්නේ එම ක්ෂේත්‍ර දෙකම සංයුක්තව ඇති නිවාස ආරක්ෂාව සඳහා නූතන අධි තාක්ෂණික මෙවලම් යොදා ගන්නා ආකාරය පිළිබඳවයි..
නිවෙසක් තෝරා ගැනීමේදී සැලකිලිමත් විය යුතු කරුණු අතරින් 20%ක් වැදගත්කමක් නිවසෙහි ආරක්ෂාවට හිමි වන බව සමීක්ෂණ වලින් පෙන්වා දී තිබේ. වර්තමානයේ නිවෙස්හි ආරක්ෂාව, තාක්ෂණීක දියුණුව හේතුවෙන් අන් කවරදාකටත් වඩා පහසුවී තිබේ.  මෙම ගෘහස්ථ තාක්ෂණයේ තවදුරටත් සිදුවන වර්ධනය හේතුවෙන් නුදුරු අනාගතයේදි අපට Hyper-Secure connected smart home සංකල්පයට පවා ලඟාවිය හැක. පහත සඳහන් වන්නේ අනාගතයේ අපට දක්නට ලැබෙන එවන් තාක්ෂණික වෙනස්කම් කිහිපයකි,

  • දොරෙහි සවි කරන ලද ඇඟිළි සලකුණු කියවන  (Door Fingerprint Reader)
මෙහිදී දොරෙහි හෝ ගේට්ටුවෙහි අගුලට ඇඟිලි සලකුණු සංවේදකයක් සවිකෙරේ. එමගින් දොරගුල කරකවන්නාගේ ඇඟිලි සලකුණු සටහන් කර ගැනෙන අතර එය ගබඩා කර ඇති අවසරලත් පුද්ගලයන්ගේ දත්ත සමඟ සසඳා බලා අනන්‍යතාව තහවුරු කර ගැනේ. එසේ අනන්‍යතාව තහවුරු කර ගැනීමට නොහැකිවිට එසේ ඇතුලුවන්නාගේ ඡායාරූපයක් සමඟ දැනුම්දීමක් නිවෙස් හිමියාගේ ජංගම දුරකථනයට මෙන්ම ආරක්ෂක නිළධාරීන් වෙතද ලැබෙනු ඇත.

  • ඇතුල්වන්නාගේ මුහුණු හඳුනා ගැනීමේ තාක්ෂණය (Cross-Checking Facial Recognition)
වඩාත් පහසුවෙන් නිවෙසට ඇතුලුවන්නන් හඳුනාගත හැකි තාක්ෂණයකි. දොරෙහි සවිකර ඇති facial recognition උපකරණයක් ආධාරයෙන් ඇතුලුවන්නාගේ දත්ත ඔබගේ සමාජ-ජාලා වෙබ් අඩවි හරහා සම්බන්ධ කල හැක. එයට අමතරව අදාල පණිවුඩ පොලිසිය වෙත යොමුකිරීමේ හැකියාව හේතුවෙන් යම්කිසි අපරාධයකදී ක්ෂණිකව ක්‍රියාකල හැක.

  • ස්මාර්ට් නිවාස (Full Smart-Home)
නිවසෙහි සියලු සේවාවන් ස්මාර්ට් ජංගම දුරකථනයක් හා සම්බන්ධ කරනු ලබන මෙම තාක්ෂණය Universal remote සංකල්පය හා සමාන වේ. ආලෝක සහ විද්යුත් උපාංග හා සම්බන්ධ චලන සංවේදක වල ක්‍රියාකාරීත්වය වහා ඔබගේ දුරකථනයට දැනුම්දෙනු ලැබේ. තවද ආරක්ෂක පද්ධතිය තම ජංගම දුරකථනය හා සම්බන්ධව ඇති හෙයින් අනවසර ඇතුලුවීමකදී ඇතුලුවන්නාගේ ඡායාරූපයක් දුරකථනයට ලබා ගැනීමේ හැකියාවද පවති.

  • සයිබර් තාක්ෂණයේ දියුණුව (Cyber-Security is Improved)
තාක්ෂණය අප ජීවිතයේ සෑම පැත්තක්ම ආක්‍රමණය කරමින් පවති, විශේෂයෙන් ගෘහස්ත තාක්ෂණය. අනෙක් පසින් මේ හා සම්බන්ධ ප්‍රධාන තර්ජනයක්ද වේ. එනම් අපරාධකරුවන්ද මෙම තාක්ෂණය තම අපරාධ සඳහා යොදා ගැනීමට ඇති හැකියාවයි. මේ හේතුවෙන් කිසියම් තර්ජනයක් කල්තියා හඳුනාගැනීමේ හැකියාවෙන් යුක්තව මුළුමනින්ම අපාරගම්‍ය Cyber-Security පද්ධතියක් තිබීම ඉතා වැදගත් වේ. මීට එක් විකල්පයක් වශයෙන් Automatic IP back තාක්ෂණය හරහා අපරාධකරුවාට නොදැනී පොලීසිය වෙත සංඥාවක් යොමුකල හැක.
මෙවැනි තාක්ෂණික උපක්‍රම යොදා ගෙන නිර්මාණය කරනු ලබන නිවාස තුල පෙරදීටත් වඩා හොඳින් ආරක්ෂාව ගැන විශ්වාසයක් තබා ගැනීමට අපට හැකි වනු ඇත.
ස්තූතිය: ගයාන් දසනායක | www.lamudi.com

February 8, 2015

කී බෝඩ් එක අලුත්වැඩියා කරන හැටි...

අපේ කොම්පියුටරේ කී බෝඩ් එක තමයි කොම්පියුටරය හසුරවන්න තියෙන ප්‍රධානතම උපාංඟය. ඉතින් මේක ටික කාලයක් ගියාම ලෙඩ දෙන්න ගන්නවා. ෂෝට් කට් ඉබේ වැඩකරනවා, මොකක් හරි අකුරක් එක දිගට ටයිප් වෙනවා නැත්නම් සමහර කී වැඩ කරන්නෙ නැතුව යනවා. මේ මොන ලෙඩේ ආවත් ගොඩක් අය කරන්නේ කී බොඩ් එකට ටිකක් හයියෙන් ගහන එක... එතකොට නම් හරියනවා. මෙහෙම ගහල කී බෝඩ් එක පිපිරුනාම අලුත් එකක් ගන්නවා...! මේ කියල දෙන්නෙ එහෙම කී බෝඩ් එකට තඩි බාන්නෙ නැතුව අලුත් එකක් ගන්නෙත් නැතුව ගෙදරදිම මේ ගැටලු නිරාකරණය කරගන්නෙ කොහොමද කියලා..
පෙර කියපු ප්‍රශ්ණ ඔක්කෝටම හේතුව තමයි කී බෝඩ් එක ඇතුලෙ තියෙන ස්විච් ටික. මේ කී බෝඩ් එකේ තියෙන ස්විච් ටිකක් වෙනස්. ඒකට හේතුව තමයි මේ ස්විච් සේරම නැමෙන සුළු ඉටි කොලයක ප්‍රින්ට් කරලා තියෙන්නෙ. හරියටා කිව්වොත් මේවා ඉටි කොල දෙකක ප්‍රින්ට් කරලා ඒ දෙක අතරට තවත් ඉටිකොලයක් දාල තමයි මේක හදලා තියෙන්නෙ..  මේ රූපය බැලුවම ඒක තේරෙයි. 
        අපි බට්න් එකක් ඔබන කොට මේ ඉටි කොල දෙක එකිනෙක ගෑවිලා පරිපථය සම්පූර්ණ වෙනවා.... මෙහෙම තමයි මේක වැඩ කරන්නෙ. ටික කාලයක් යනකොට මේ ස්ව්ච් ඉබේ ලුහුවත් (ෂෝට්) වෙනවා. ගේම් ගහන කොට, ඇතුලට දූවිලි ගියාම මේ ගැටලු ඇති වෙනවා.. මේක නිවැරදි කරන්නෙ මෙහෙමයි...රූප නම් ටිකක් පැහැදිලි මදි ඇති..ඒකට sorry!

*මුලින්ම කී බෝඩ් එක අනෙක් පැත්ත හරවලා නියනකින් ඇණ ටික ගලවන්න. මතක තියාගන්න ඇණ හැම තැනම දාන්න එපා. ඔක්කොම එක තැනක තියා ගන්න (ඇණ 20 විතර තියෙනවා). මොකද මේ ඇණ අඩු වුණොත් ඒකත් තව ලෙඩක්...
*ඇණ ටික සේරම ගැලෙව්වට පස්සෙ පිට පියන පරෙස්සමට අයින් කරන්න. කලබල වෙලා අයින් කලොත් ඇතුලෙ තියෙන රබර් බොත්තම් එහෙ මෙහෙ විසිවෙන්න පුලුවන්. ඒ හැම කෑල්ලක්ම කීබෝඩ් එකට ඕනි.
*දැන් අර මම ඉස්සෙල්ල කියපු ඉටි කොල ටික පෙනේවි. දැන් මේ ඉටිකොල ටික පරිස්සමෙන් අයින් කරගන්න ඕනි. 
       ඒකට මුලින්ම ඉටි කොල වලට සම්බන්ඳ කරල තියෙන සර්කිට් එකෙන් මේක ගලව ගන්න ඕනි. ඒක කරන්න සර්කිට් එකේ තියෙන රබර් පටි කෑල්ල හෙමිහිට  ගලවන්න.
*දැන් ඉටි කොල 3 එලියට ගන්න. මේ 3 ම එකිනෙක සම්බන්ඳ කරල තියෙන නිසා වෙන්වෙලා යන්නෙ නෑ.
*ඊළඟට කරන දේ ටිකක් ප්‍රවේසමින් කරන්න ඕනි. සිනිදු රෙදි කෑල්ලක් අරගෙන අර ඉටි කොල වල ස්විච් ප්‍රින්ට් කරලා තියෙන ටික පිහ දාන්න. ගොඩක් තදින් අතුල්ලනත් එපා.. ඒවගේම වැඩිය හොඳට ටිනර්, සර්චිකල් හරි වෙන මොනවත්ම කොහෙත්ම දාන්න එපා! ඒවා දාලා පිහ දැම්මොත් අර ස්විච් මැකිල යනවා. ඒකට හේතුව තමයි ඒ ප්‍රින්ට් කරලා තියෙන්නෙත් විශේෂ තින්ත වර්ගයකින් වෙන එක. බැරිවෙලාවත් ඒවා මැකිල ගියොත් වැඩ කරපු බට්න් පවා වැඩකරන්නෙ නැති වේවි. ඒ වගේම කී බෝඩ් එකේ සර්කිට් එකේ ඉටි කොල වලට සෙට් වෙන තැන් ටිකත් පිහදාන්න..
*හොඳට දූවිලි පිහදාලා ඉටි කොල ටික ආයෙත් හරියට හයි කරන්න.. ඊට ඉස්සෙල්ල රබර් බොත්තම් ටික තියෙනවද කියල බලන්න. ඔක්කොම හයිකරලා පිට පියනත් හයි කරලා ඇණ දාල තද කරන්න.. 
         දැන් ප්‍රශ්ණය විසඳිලා තියේවි.. කී බෝඩ් එකේ එක බට්න් ඒකක් හරි ඇතුලට බැහැල තියෙනවනම් ඒකට හේතුව අර රබර් බොත්තමක් අඩු වෙලා තියෙන එක. එහෙම වුණෝතින් ආයෙත් කී බෝඩ් එක ගලවන්න වේවි. ඒ නිසා පරිස්සමට වැඩේ කරන්න.... ගැටලු තියෙනවනම් කොමෙන්ට් එකක් දාන්න...
  

එකතුවෙන්න...

 
         
 

tech එකේ ඉන්න අය

Contact Form

Name

Email *

Message *

ජනප්‍රිය ලිපි

ලිපි එකතුව

ආව ගිය අය

page visitor counter

ලිපි කියවා ඇති ගණන

tech සයුර Copyright © 2014 - All rights reserved.