July 29, 2015

අකුණු විදුලිය ගබඩා කිරීමට හැකි විස්මිත කුළුණ

                             අකුණු ගහනවා, විදුලි කොටනවා නැත්නම් සරලවම් කිව්වොත් හෙණගහනවා කියන්නෙත් එකම දේකට. ස්ථිති විද්‍යුත් ආරෝපණය නිසා වලාකුළු වල එක් ‍රැස් වෙන ආරෝපණ වලාකුළකින් වලාකුළකට වගේම පොළවටත් පැමිණෙනවා (ඒ ගැන විස්තර කරන්න ගියොත් මේ පෝස්ට් එක ඒකටම වැය වෙනවා) . මේ විදුලි කෙටීම නිසා ඇතිවෙන විදුලි බලය සුලුප‍ටු නෑ. ඒවා මනින්න වෙන්නෙ වෝල්ට් මිලියන බිලියන ගණන් වලින්. ඉතිං මේ විදුලි බලය ගබඩා කරගෙන වැඩක් කර ගන්න පුලුවන් නම් ගොඩක් වටිනවා. ඒත් ඒක ලෙහෙසි පහසු වැඩක් නෙවෙයි.
                          මේ ගැන කල්පනා කරපු සුප්‍රසිද්ධ විදුලි වාහන නිපදවන ටෙස්ලා සමාගම අපූරු කුළුනක් නිර්මාණය කරලා තියෙනවා. "Tesla baby" නමින් මේ කුළුනෙ තියෙන විශේෂත්වය තමයි අකුණු වලදී ඇතිවෙන විදුලිය මේ කුලුණ තුල ගබඩා කර තබා ගැනීමට හැකි වීම. රුසියාවේ මොස්කව් නුවර ඉඳලා කි.මි 40ක් ඇතුලතින් තමයි මේ කුළුණ තියෙන්නෙ. මේක කුළුණක්ම විතරක් නෙවෙයි. විදුලි ගබඩා සංකීර්ණයක්.   
                                        අකුණක තියෙන විශේෂත්වය තමයි අධික විදුලියක් ඇති වුණත් මේ විදුලිය පවතින්නේ තත්පරයෙන් 1/100 පමණ කාලයක් වීමයි. මේ නිසා මෙයින් ඇතිවෙන ශක්තිය අති විශාලයි. මෙවැනි ශක්තියකට ඔරොත්තු දෙන්න පුලුවන් විදිහට තමයි මේ කුළුණ හදල තියෙන්නෙ. කොහොම උනත් මේක වැඩ කරන්නෙ අකුණු ගහන වෙලාවට විතරයි. මේ ව්‍යාපෘතියට අදාල උපකරණ නඩත්තු කරන්න වගේම පරීක්ෂණ වලටත් ඉතා අධික වියදමක් දරන්න ටෙස්ලා සමාගමට සිදුවෙලා තියෙනවා. ඒ වගේම මේක රුසියාව රහසිගතව ක්‍රියාත්මක කල ව්‍යාපෘතියක්.
                                    මේ වගේ කුලුණක් මීට ඉස්සර ඇමරිකාවේත් පිහි‍ටුවා තිබුණත් මේ නව කුලුණේ ඇති හැඩය හා තාක්ෂණය අනේක් ඒවාට වඩා වෙනස් ආරකින් නිර්මාණය වූවක්. ‍රැහැන් රහිත විදුලි සම්ප්‍රේෂණය කිරීම සඳහා කරන පරීක්ෂණ වල ප්‍රථිඵලයක් විදිහට තමයි මේ නිර්මාණය බිහිවෙලා තියෙන්නේ.

July 24, 2015

ලෝක වාර්තා තැබූ ඉලෙක්ට්‍රික් රේසිං කාරය

                                                            ඉලෙක්ට්‍රික් කාර් අද ලෝකයේ ප්‍රධාන මාතෘකාවක්. නැතිවී යන ඛනිජ තෙල් වෙනුවට පුනර්ජනනීය බලශක්තියක් වන විදුලියෙන් දුවන වාහන නිපදවන්න ගොඩක් අය උතසහ කරනවා. ඒත් විදුලියෙන් දුවන රේසිං කාර් හදන්න පුලුවන්ද? ලෝකෙටම ප්‍රශ්ණයක් වෙලා තිබුන මේ ගැටලුවට විසඳුමක් දෙන්න දැන් පුලුවන් වෙලා තියෙනවා.
                     GreenTeam Uni Stuttgart කියන ටීම් එක තමයි මේ කාර් එක හදල තියෙන්නෙ. මේ රේසිං කාර් එකට තත්පර 1.779 කදී පැ.කි 0-100 දක්වා වේගයක් ගන්න පුලුවන්.
                                  මේක ගිනස් ලෝක වාර්තාවක් විදිහටත් නම් කරලා තියෙනවා. ග්‍රීන් ටීම් එක මේ වාර්තාව තියල තියෙන්නෙ මීට කලින් තියපු තත්පර 1.785 වාර්තාව බිඳලා . මේ මෝටර් රථයට කලින් මොවුන් විසින් තවත් මෝටර් රථ 4ක් නිපදවා තිබෙනවා.
ළඟදීම දවසක අපිටත් ඉලෙක්ට්‍රික් කාර් රේසිං තරඟ බලන්න හැකියාවක් ලැබෙවි. ඒ වගේම අපේ රටේ හදන වේගා ඉලෙක්ට්‍රික් කාර් එකත් ලඟදීම එළි දක්වාවි. සමහර විට මේ ලෝක වාරතාව බිඳ දමන්න අපේ වේගා කාර් එකට හැකි වේවි...!

July 22, 2015

මිනිසා හඳට ගෙනගිය ඇපලෝ ගයඩන්ස් පරිගණකය

                                 මිනිසා සඳ මත පා තබා මේ මාසෙ 20 දිනට අවුරුදු 46 ක් සපිරුනා. මේ කියන්නෙ සඳ මත පා තැබීමේ මෙහෙයුමට තීරනාත්මක විදිහට දායක වුණ උපකරණයක් ගැන. ඒ තමයි නීල් ආම්ස්ට්‍රෝං ගමන් කල ඇපලෝ 11 යානය පාලනය කල ඇපලෝ ගයඩන්ස් කියන පරිගණකය ගැන. අභ්‍යවකාෂ තරණයට රුසියාව යි ඇමරිකාව යි අතරේ ලොකු තරඟයක් තිබුණ බව දන්නවා ඇති. සඳ ගමන කටයුතු දුරස්ථව පාලනය කලහොත් රුසියාවෙන් ඊට බාධා ඇති වේ යැයි බියෙන් ඇමරිකාව යානයේ මුලු පාලනය පරිගණකයකට බාර දීමට අදහස් කලා. එකල තිබූ තාක්ෂණයට අනුව කාමර තරම් වූ පරිගණකයකින් කුඩා පෙට්ටියක් තරම් වූ දෝෂ රහිත නිවැරදිම ක්‍රියාකාරිත්වයක් ඇති පරිගණකයක් නිපදවීම ලෙහෙසි කටයුත්තක් වුණේ නැහැ.
                                    නාසා ආයතනය මේ බැරෑරුම් කටයුත්ත බාර කලේ ඇමරිකාවේ මැසචුසෙට්ස් තාක්ෂණික ආයතනයටයි (MIT). ස්ටීව් බෙල්ස් ඇතුලු පරීක්ෂකයන් කණ්ඩායමක් මේ වැඩේ භාරව සිටියේය.IC නැතිනම් සංයුක්ත පරිපථ මුලින්ම යොදා ගත්තේ මේ ගයඩන්ස් පරිගණකයේදීයි. රේතියන් නම් සමාගමක් විසින් සිදුකල මෙහි ඇති විශේෂත්වය නම් මේ සියලුම IC රෙදි විවීමේ ‍රැකියාවේ නියුතු කාන්තාවන් විසින් අතේ වියන ලද ඒවා වීමයි.   
                                       මෙවැනි IC 5000 ක් පමණ නිපදවිණි .එයට යොදා ගත්තේ සියුම් කම්බි යකඩ හර වටා ගොතා සකස් කර ගත් කම්බි රටාවකි. ඒවා අතර විදුලිය ඇතිවීම නැතිවීම මත ඩිජිටල් '1' හා '0' සංඥා ඇතිකල හැක. මේ සංඥා මගින් පරිගණකය ක්‍රියාත්මක වේ. පරිගණකය ක්‍රියා කිරීමට අවශ්‍ය මෘදුකාංඟ නිර්මාණය කලේ ඩොන් අයිල්ස් සමග පීටර් ඇඩ්ලර් ය. එම මෘදුකාංඟ පරිගණකයේ දෘඩාංඟ දෙස කෙලින්ම බලා නිර්මාණය කර ඇත. මේ සියලු වැඩකටයුතු නිමවීමට අවුරුදු 7ක් ගතවිය.
                                ගයඩන්ස් පරිගණකය කෙටීයෙන් හැදින්වූයේ ඩිස්කි (DSKY- Display and Keybord Unit) කියාය. වේගය 2.048MHz වූ මෙහි ‍රැම් මතකය වචන(Word) 2048  වූ චුම්බක මතකයක් හා සප්තඛනඩ ප්‍රදර්ශක තිරවලින් , බල්බ වලින් සමන්විත මෙහි රොම් මතකය වචන 36,864 විය.
                                    මෙය අද කාලේ ඇති සාමාන්‍ය ජංගම දුරකථනයකටත් වඩා මන්දගාමීය. නමුත් ඒ කාලයේ මෙය ඉතා වේගවත් පරිගණකයකි. වොට් 70ක ක්ෂමතාවකින් ක්‍රියා කරන මෙහි බර කි.ගැ 31.8 කි. තවද සෙ.මි 61x32x17 ප්‍රමාණයකින් යුතුවිනි.දැන් ඇමරිකානු ජාතික කෞතුකාගාරයේ ඇති මෙය අදටත් හොඳින් ක්‍රියාත්මක වේ.

July 18, 2015

වින්ඩෝස් කොර්ටානා ඇන්ඩ්‍රොයිඩ් වලටත්

ඇපල් අයි ඕඑස් එකට එන ඇපල් සිරි ඇප් එක වගේ මයික්‍රෝසොෆ්ට් වින්ඩෝස් වලට එන කෘතීම බුද්ධි වැඩසටහන තමයි වින්ඩෝස් කොර්ටානා කියන්නේ. වින්ඩෝස් වලට හදපු මේ ඇප් එක ඇපල් වලටත් ඇන්ඩ්‍රොයිඩ් වලටත් දෙන්න යනවා කියලා කතා පැතිරුනා. දැන් ඒ කතා ඇත්තක් වෙමින් ඇන්ඩ්‍රොයිඩ් මත ක්‍රියාත්මක වන කොර්ටානා ඇප් එක සහිත පින්තූර කිහිපයක් නිකුත් වී තිබෙනවා. ඒ ඇන්ඩ්‍රොයිඩ් මෙහෙයුම් පද්ධතිය සහිත  HTC One M9 දුරකථනය මතයි.

කෙසේ නමුත් මේ ඇප් එක මගින් වින්ඩෝස් සඳහා ලබාදෙන සියලු පහසුකම් ඇන්ඩ්‍රොයිඩ් මතදී දැනට ලබා ගැනීමට හැකියාවක් නැති අතර රිමයින්ඩර් තැබීම, ඇමතුම් නාමාවලිය ලබා ගැනීම, කාලගුණ විස්තර ලබා ගැනීම වැනි කාර්‍යයන් සඳහා පමණක් දැනට මෙම ඇප් එක සහය දක්වයි.

July 17, 2015

VB වලින් ජැක්පොට් ගේම් එකක් හදමු...

ජැක් පොට් කියන්නෙ ඔට්‍ටු තබා ක්‍රිඩා කරන ක්‍රීඩාවක් කියල දන්නවා ඇති. එක සමාන රූප එක පෙළට පැමිණෙන අවස්ථා ලබා ගනිමින් මෙම ක්‍රීඩාව ජය ලබා ගන්න පුලුවන්. 
පරිගණකයෙන් ක්‍රීඩා කරන්න පුලුවන් විදිහට හදපු මේ ක්‍රීඩාව තියෙන ගේම් සමහර විට දැකලා තියෙනවා ඇති. මේ පෝස්ට් එකේ තියෙන්නෙ ඒ ගේම් එක VB  නැත්නම් විෂුවල් බේසික් වලින් හදාගන්නෙ කොහොමද කියලා.
මේ ප්‍රෝග්‍රෑම් එකට  ටයිමර් 3ක්, ඉමේජ් ලිස්ට් එකක් (IList1), කමාන්ඩ් බට්න් එකක් (), කන්ට්‍රෝල් ඇරේ එකක් විදිහට ඉමේජ් බොක්ස් 9ක් (Image1(0), Image1(1)...) යොදා ගෙන තියෙනවා. කමාන්ඩ් බට්න් එකෙන් ගේම් එක ක්‍රියාත්මක වෙන්න පටන් ගන්නවා. ටයිමර් 3 ඔන් වෙලා ඉමේජ් බොක්ස් වලට ඉමේජ් ලිස්ට් එකෙන් ඉමේජ් ලබාදෙනවා. එක ටයිමර් 1කින් ඉමේජ් බොක්ස් 3ක් ක්‍රියාත්මක කරනවා .
                                      ඒත් මේ සියල්ල සිදුවන්නෙ Randam  නැත්නම් සසම්භාවීව. ටයිමර් 3නේ නවතින වෙලාව, ලෝඩ් වෙන ඉමේජ් එක ‍තෝරන්නෙත් සසම්භාවීව. මේකට යොදා ගන්න VB කමාන්ඩ් එක තමයි Randomize .
වැඩි විස්තර බලන්නත්, මේක තව වැඩි දියුණු කරගන්නත් පහලින් දීල තියෙන ලින්ක් එකෙන් ප්‍රෝග්‍රෑම් එකේ සෝස් කෝඩ් ඒක ඩවුන්ලෝඩ් කරගන්න. හැබැයි මේ ගේම් එක සූදුවට ගන්නවා එහෙම නෙවෙයි!

July 12, 2015

ගූගල් වෙතින් ස්පෑම් වලකන්නට කෘතීම බුද්ධිය

                            පරිගණක ලෝකයේ තිබෙන දැවැන්තම ආරක්ෂක අර්බුද අතරින් ස්පෑම් ඊ-මේල් ඉහල ස්ථානයක් ගනී. නොයෙක් ඖෂධ, නිෂ්පාදන දැන්වීම් ගැන ඇති ඊ-මේල් බුරුතු පිටින් එවීම ස්පෑම් ඊ-මේල් එවන්නාගේ ‍රැකියාවයි. ඊ-මේල් ගිණුමේ ඇති ඉන්බොක්ස් එක සම්පූර්ණවම පිරී යන්නේ මේ එවන ඊ-මේල් නිසාවෙනි. එසේම වෙබ් තදබදය ඇතිවීමට මූලිකම හේතුවක් වන්නේ ස්පෑම් ය.
                                             මේ ගැන අධ්‍යනයක් කල ගූගල් සමාගම සිය ඊ-මේල් සේවාව වන ජීමේල් තුලට කෘතීම බුද්ධි වැඩසටහනක් එක් කිරීමට කටයුතු කර ඇත. ස්පෑම් යැයි හඳුනාගන්නා ඊ-මේල් හඳුනා ගෙන ඒවා ඉවත් කිරීමේ හැකියාවක් දැනටමත් ජීමේල් තුල පවතී. දැනට තිබෙන තාක්ෂණයේදී ස්පෑම් හඳුනාගැනීම 0.1%  වන අතර මග හැරීමේ හැකියාව  0.05% කි. කෘතීම බුද්ධි වැඩසටහනක් යොදා ගෙන එය 99.9% හඳුනා ගැනීමේ හැකියාවක් දක්වා වැඩි දියුණු කිරීමට ඔවුන් කටයුතු කරමින් ඇත. මෙවැනි ඊ-මේල් බොහෝ විට මත් ද්‍රව්‍ය, ව්‍යාජ ඖෂධ ගැන වූ ඒවා වේ. මේ නිසා ස්පෑම් නිසා සිදුවන බලපෑම සුලුප‍ටු නොවේ.
                                  මේ නව ක්‍රමවේදයේදී කෘතීම ස්නායු ජාලයක් (Artificial neural network) යොදා ගෙන අනර්ථකාරී ඊ-මේල් හඳුනා ගනී. මුලින්ම එය සාමාන්‍ය ස්පෑම් හඳුනා ගැනීමේ යාන්ත්‍රනයට යොමු කර පසුව මෙම ජාලය හරහා පරික්ෂා කරයි. ස්පෑම් ඊ-මේල් හඳුනා ගැනීමේ යාන්ත්‍රනය මග හරවා ස්පෑම් ඊ-මේල් එවීමට ඇතැමෙක් සමත්වී තිබේ. කෘතීම බුද්ධි වැඩසටහනක් යොදා ගත හොත් මේ කුමන ආකාරයෙන් එවන ඊ-මේල් උවද හඳුනා ගත හැකිය. ඇත්ත වෙබ් අඩවි ලෙසම සැකසූ ව්‍යාජ වෙබ් අඩවි හෙවත් ‍ෆිෂිං (Phishing) වෙබ් අඩවි වලින් එවන ඊ-මේල් වලට පිලිතුරු දීමට ගොස් ක්‍රෙඩිට් කාඩ් අංක හා සමාජ ජාල ගිණුම් හැකර් කරුවන් අතට පත් වීම වැලැක් වීමට මේ විශේෂිත ඇල්ගොරිදමයට පුලුවන්.
                                මේ ක්‍රමය නිසා පුවත් වෙබ් අඩවි වලින් එවන අලුත් පුවත් ඇතුලත් ඊ-මේල් (Newsletters) ඉවත් නොවන අතර, ඉවත් විය යුතු හා නොවිය යුතු දෑ ගැන ජීමේල් ගිණුම "දැනුවත්" කිරීම කිරීම පරිශීලකයාට කල හැක. එමගින් ඉවත් විය යුත්ත, නොවිය යුත්ත ගැන මේ කෘතිම බුද්ධි වැඩසටහනට ඉගෙනීමට පුලුවන්. 
                                තම සේවා වලට කෘතිම බුද්ධි වැඩසටහන් එක් කිරීමට ලොව ප්‍රමුඛ පෙලේ වෙබ් සේවා සමාගම් කීපයක්ම සිදු කර ඇත. ෆේස් බුක් වෙබ් අඩවියේ එක් කරන පින්තූර වල මුහුණු හඳුනා ගැනීම, ට්විටර් අඩවියේ පලවන අසැබි ලිපි හඳුනා ගැනීම මින් සමහරක්.

July 8, 2015

2016 දී ඇමරිකාව හා ජපානය රොබෝ යුද්ධයක්

               මීට ටික දිනකට ඉහතදී ඇමරිකාව යුධ රොබෝවක් තැනුවා. විද්‍යා ප්‍රබන්ධ කතා වල එන රොබෝ වරයකුට සමාන හැඩයකින් යුතු මෙම රොබෝව Megabot  (Megabot MK II) ලෙස හඳුන්වා දී ඇත. මෙම රොබෝව නිපද වූ ඇමරිකාව ජපානයට අභියෝගයක්ද දෙනු ලැබුවා. ඒ අභියෝගය බාර ගත් ජපානය ඔවුන්ගේම  Kuratas (Suidobashi Kuratas) නමින්  යුධ රොබෝවක් එළිදක්වනු ලැබුවා
Megabot රොබෝව අඩි 15ක් පමණ උසින් යුතු අතර 5500 kg තරම් බරකින් යුක්තය. ගමන් කිරීමට යුධ ටැංකි වලදී යොදා ගන්නා ආකාරයේ පථයක් යොදා ගනී.මෙය පාලනය කිරීමට නියමුවන් දෙදෙනක් සිටින අතර එක් අයකු රොබෝව ධාවනය කරන අතර අනෙක් නියමුවා යුධ උපකරණ හසුරවයි.
ජපානයේ  Kuratas රොබෝව අඩි 13 ක් පමණ උසින් යුතු වන අතර 4000 kg තරම් බරකින් යුක්තයි. Megabot  හිදී මෙන් නොව මෙය ගමන් කිරීමට යොදාගෙන ඇත්තේ සාමාන්‍ය ආකාරයේ රෝද 3කි. එමගින් රොබෝවට ඉක්මනින් හැරීමට මෙන්ම ගමන් කිරීමට හැකියාව ලැබී ඇත. එසේම මෙය පාලනය කිරීමට අවශ්‍ය වන්නේ එක් නියමුවකු පමණි. ගුවන් යානා පාලනයේදී මෙන් මෙහිදී cockpit එකක් මගින් පාලනය කරනු ලබයි. හෙඩප් ඩිස්ප්ලේ, ස්ව්‍යංක්‍රීය ඉලක්ක අනාවරකයක් (automated target acquisition) කින්ද යුක්ත වනවා.
මෙම රොබොවන් දෙකෙහිම ප්‍රහාර සඳහා ජල මිසයිල හා අත්, පා පහරවල් යොදා ගනු ලබයි. මෙම කණ්ඩායම් දෙකටම මාස 12ක් කාලයක් සිය රොබෝවන් තව දුරටත් වැඩි දියුණු කිරීමට කාලය ලබා දී ඇත. ඉන් පසු 2016 වසරේ දී ලොව මුල්ම රොබෝවරුන් අතර ද්වන්ද සටන ඇතිවනු ඇත! රියල් ස්ටීල් චිත්‍ර පටියේ සැබෑ ආකාරය නැරඹීමට ලොවට අවස්ථාව උදා වනු ඇත.
කෙසේ වෙතත් මෙය නිකන්ම නිකන් රොබෝ සටනක් ලෙස සැලකිය නොහැක. ඇමරිකාව හෝ ජපානය මේ සැරසෙන්නේ නව යුධ උපකරණ අත්හදා බැලීමකටද....? 

July 4, 2015

ඩිලීට්,රීනේම් කරන්න බැරි ෆෝල්ඩරයක් හදමු

කාට හරි ඕනි නම් ඩිලීට් කරන්න නැත්නම් රීනේම් කරන්න බැරි ෆෝල්ඩරයක් හදා ගන්න, මේ තියෙන්නෙ ඒකට ක්‍රමයක්. මේ හදන ෆෝල්ඩරය සාමාන්‍ය ක්‍රමයට ඩිලීට් කරන්නවත් රීනේම් කරන්නවත් බෑ.
මේක කරන්න පොඩි උපක්‍රමයක් තමයි යොදාගෙන තියෙන්නෙ. පරිගණක භාෂාවල මූලපද නැත්නම් කීවර්ඩ්ස් (Keywords) භාවිතා වෙනවා. මේ කී වර්ඩ් සාමාන්‍ය විචල්‍ය (Variables) වලට, නම් වලට යොදා ගන්න බෑ. වින්ඩෝස් වල මෙහෙම යොදාගෙන තියෙන කී වර්ඩ් තියෙනවා. con, aux, lpt1, lpt2, lpt3, lpt4, lpt5, lpt6, lpt7, lpt8 and lpt9 කියන්නෙ ඒ අතරින් කිහිපයක්. ඉතිං මෙන්න මේ කී වර්ඩ් වල නමක් අරගෙන ෆෝල්ඩරයක් හැදුවොත්. ඩීලීට් කරන්නත් බෑ.... රීනේම් කරන්නත් බෑ... හැබැයි මේ ෆෝල්ඩරය නිකං හදන්නත් බෑ! ඒකට ක්‍රමය තමයි මේ....
ෆෝල්ඩරය හදන විදිහ....
                            මුලින්ම Strat මෙනු එකට ගිහින් CMD කියල ටයිප් කරලා, නැත්නම් Win+R ඔබලා ඒකෙ CMD කියල ටයිප් කරල කමාන්ඩ් ප්‍රොම්ට් එක ඕපන් කර ගන්න. දැන් ෆෝල්ඩරය හදන්න කැමති වින්ඩෝස් ඉන්ස්ටොල් කරල තියෙන ඩ්‍රයිව් එක නැතුව වෙන ඩ්‍රයිව් එකක් ‍තෝර ගන්න. අපි හිතමු ‍තෝරගත්ත ඩ්‍රයිව් එක D කියලා. දැන් කමාන්ඩ් ප්‍රොම්ට් එකේ D: කියල ටයිප් කරල Enter කී එක ඔබන්න. දැන් md con\ කියල ටයිප් කරල Enter කරන්න. දැන් වැඩේ හරි... 
                                        දැන් අර ඩ්‍රයිව් එකට (D එකට) ගිහින් ෆෝල්ඩරය ඩිලීට් කරන්න හරි රීනේම් කරන්න හරි බලන්න... බෑ නේද මේ කමාන්ඩ් එකේ md කියන් එකෙන් තමයි ෆෝලඩරය හදන්න (Made Directory) දෙන කමාන්ඩ් එක. ඕනි නම් වෙනින් එකක් උනත් හදා ගන්න පුලුවන්... එතකොට con කියන්නෙ දීපු නම ඒ වෙනුවට අර උඩින් තියෙන con, aux, lpt1, lpt2, lpt3, lpt4, lpt5, lpt6, lpt7, lpt8 and lpt9 වගේ ඕනිම නමක් දෙන්න පුලුවන්.
ඩිලීට් කරන්නෙ මෙහෙමයි
හරි දැන් ඉතින් මේක හැදුව වගේම ඩිලීට් කරන්නත් එපැයි. ඒක කරන්න පුලුවන් වෙන්නෙත් කමාන්ඩ් ප්‍රොම්ට් එකෙන්ම තමයි. ඒකට rd con\ කියන කමාන්ඩ් එක දීලා Enter කරන්න. දැං ෆෝල්ඩරය ඩිලීට් වෙයි. 
                                    con කියල දීල තියෙන්නෙ මුල්දි හදපු ෆෝල්ඩරයට දුන්න නම. ඒ වෙනුවට වෙනින් නමක් ගත්ත නම් ඒක දෙන්න. වින්ඩෝස් XP, Vista, 7, 8, 8.1 මේ ඕනි එකක මේක වැඩ...

එකතුවෙන්න...

 
         
 

tech එකේ ඉන්න අය

Contact Form

Name

Email *

Message *

ජනප්‍රිය ලිපි

ලිපි එකතුව

ආව ගිය අය

page visitor counter

ලිපි කියවා ඇති ගණන

tech සයුර Copyright © 2014 - All rights reserved.